Ինձ և մեր քաղաքացիների մեծամասնությանը հոգնեցրել են Նիկոլ Փաշինյանի անօրինականությունները մեր եկեղեցու նկատմամբ․ Թաթոյան

Ինձ և մեր քաղաքացիների մեծամասնությանը հոգնեցրել են Նիկոլ Փաշինյանի անօրինականությունները մեր եկեղեցու նկատմամբ, քանի որ դա արդեն պայքար է մեր պետականության դեմ, քայքայում է մեր դիմադրողականությունը։

Մեզ պետք է այնպիսի պետություն, որի ղեկավարը առաջնորդվում է բացառապես օրենքով, որի ղեկավարը զբաղված չէ հանուն իր անձնական և քաղաքական շահերի մարդկանց ձերբակալելով, որի ղեկավարը չի միջամտում եկեղեցու ներքին գործերին, իսկ եկեղեցու ներկայացուցիչները չունեն որևէ քաղաքական պաշտոն զբաղեցնելու կարիք։

Այս ամենը մեզ շեղում է մեր հիմնական օրակարգից։

Այս անվերջ մանիպուլյացիաները, Նիկոլ Փաշինյանի բաժանարար քաղաքականությունը, եպիսկոպոսների անձնական կյանքի քննարկումները, Վարչապետի անձնական կյանքի քննարկումները`

1. Չեն ստեղծում գոնե մեկ աշխատատեղ։

2. Չեն ամրապնդում մեր Զինված ուժերը։

3. Չեն բարելավում մեր կրթական համակարգը

4. Չեն ստիպում հակառակորդին դուրս գալ մեր երկրից զավթված տարածքներից:

Հետևաբար մենք չպետք է թույլ տանք, որ մեզ շեղեն այս հարցերով։

Մենք պետք է կենտրոնանանք մեր օրակարգային խնդիրների վրա, մեր երկրի համար անհրաժեշտ։

Ես շարունակելու եմ կենտրոնանալ իմ օրակարգային խնդրի վրա` ստեղծել բարեկեցիկ, ուժեղ, արդար Հայաստան։