Վրաստանի խորհրդարանի շենքի մոտ զանգվածային բողոքի ցույց է անցկացվում՝ Զուրաբիշվիլին միացել է ցուցարարներին

Թբիլիսիի Ռուսթավելի պողոտայում՝ Վրաստանի խորհրդարանի շենքի մոտ, բողոքի ցույց է անցկացվում, հայտնում է Վրաստանի Առաջին ալիքը։

Դատելով հրապարակված լուսանկարներից՝ բողոքի ակցիային հազարավոր մարդիկ են հավաքվել ։

Հանրահավաքի մասնակիցները բողոքում են «Վրացական երազանքի» այսօրվա որոշման դեմ և պնդում են, որ իշխանությունը վերջնականապես հրաժարվել է երկրի եվրոպական կուրսից։ Հանրահավաքի մասնակիցների կարծիքով՝ Վրաստանի եվրոպական ընտրությունը պետք է փրկվի, և մարդկանց կոչ է արվում միանալ բողոքի ակցիային։

Հանրահավաքի մասնակիցները հավաքվել էին նաև «Վրացական երազանքի» գրասենյակի մոտ։ «Երազանքի» շտաբի մոտ հավաքվածներն ավելի ուշ երթով շարժվեցին դեպի խորհրդարան և միացան այնտեղ հավաքված մյուս ցուցարարներին:

Հանրահավաքին ներկա են նաև տարբեր ընդդիմադիր քաղաքական կուսակցությունների և հասարակական կազմակերպությունների ներկայացուցիչներ։

Վրացական լրատվամիջոցները հայտնում են նաև, որ ակցիային միացել է Վրաստանի նախագահ Սալոմե Զուրաբիշվիլին։