Ֆիլիպինների հյուսիսում «Տրամի» արևադարձային փոթորկի հետևանքով զոհերի թիվը հասել է 81-ի։
«ՌԻԱ Նովոստի»-իի փոխանցմամբ, այս մասին հայտնում է ֆիլիպինյան GMA News հեռուստաալիքի կայքը։
Ավելի վաղ հաղորդվել էր առնվազն 60 մահվան մասին։
Ֆիլիպինների քաղաքացիական պաշտպանության դեպարտամենտն էլ հայտնում է, որ 66 մարդ վիրավորվել է, ևս 34 մարդ անհետ կորել է արևադարձային փոթորկի պատճառով, որը նպաստել է Լուսոն կղզում հորդառատ անձրևներին՝ հանգեցնելով հեղեղումների։
Փոթորկից այս կամ այն կերպ տուժածների թիվը գերազանցում է 4,4 միլիոնը։ Մի քանի հարյուր հազար մարդ տարհանման կենտրոններում է։
Դպրոցներն ու պետական գրասենյակները դադարեցրել են իրենց աշխատանքն ամբողջ Լուսոնում: Տրանսպորտային ենթակառուցվածքները խաթարվել են, չեղարկվել են կանոնավոր չվերթները։ Մոտ տասնյակ հազարավոր մարդիկ շարունակում են մնալ Ֆիլիպինների նավահանգիստներում:
