Պավել Դուրովի կալանքը Ֆրանսիայում կրկին երկարաձգվել է

Կիբերհանցագործությունների գործով հետաքննության շրջանակներում Telegram-ի հիմնադիր Պավել Դուրովը կմնա կալանքի տակ ևս 48 ժամ: Այս մասին հայտնում է Reuters գործակալությունը՝ հղում անելով Փարիզի դատախազության հայտարարությանը։

Հիշեցնենք, որ Պավել Դուրովը ձերբակալվել է Փարիզի Լե Բուրժե արվարձանի օդանավակայանից բերման ենթարկվելուց հետո։ Նա մեղադրվում է 12 հանցագործության համար։

Դուրովը մասնավոր ինքնաթիռով Ֆրանսիա է ժամանել Բաքվից: Ավելի ուշ հայտնի է դարձել, որ ձեռնարկատերը կալանավորվել է։

Ֆրանսիական լրատվամիջոցների փոխանցմամբ՝ Դուրովը, որը Ֆրանսիայի քաղաքացիություն ունի, եղել է երկրում հետախուզվողների ցուցակում։ Նախաքննության հիման վրա համապատասխան հարցումով դիմել է Ֆրանսիայի անչափահասների դեմ ուղղված հանցագործությունների դեմ պայքարի վարչությունը։