![](/static/news/b/2024/02/857081.jpg)
Տեխասի բնակիչը 2023 թվականի փետրվարին ֆոնդային բորսայում ապօրինաբար 1,76 մլն դոլար է վաստակել՝ ականջ դնելով կնոջ աշխատանքային զանգերին։ Այս մասին հայտնում է Business Insider-ը։
«Թայլեր Լաուդոնը խոստովանել է, որ գնել է TravelCenters of America-ի հազարավոր բաժնետոմսեր անմիջապես այն բանից առաջ, ինչ վերջինս 2023 թվականի փետրվարին 1,3 միլիարդ դոլարով գնվել է BP նավթագազային ընկերության կողմից», - Տեխասի հարավային շրջանի դատախազ Ալամդար Համդանիի խոսքերն է մեջբերում պարբերականը։
Աղբյուրը, հղում անելով Արժեթղթերի և բորսաների հանձնաժողովի (SEC) տվյալներին, հայտնում է, որ Լաուդոնի կինն աշխատել է BP-ում որպես ձեռքբերումների և միաձուլումների մենեջեր։ Ամուսիններն աշխատում էին հեռահար, ուստի կարող էին լսել մեկը մյուսի աշխատանքային խոսակցությունները։ Հանձնաժողովի ներկայացրած հայցում նշվում է, որ իմանալով սպասվող գործարքի մասին՝ Լաուդոնը TravelCenters of America-ի ավելի քան 45 հազար բաժնետոմս է գնել ու վաճառել դրանք ընկերության գնման մասին հայտարարվելուց հետո։
Աղբյուրի հաղորդմամբ՝ ավելի ուշ տղամարդն իմացել է ներքին հետաքննության մասին ու խոստովանել կնոջն իր արածը։ Պարբերականի տվյալներով՝ կնոջն ազատել են աշխատանքից, ինչից հետո նա բաժանվել է ամուսնուց։ Ինչ վերաբերում է Լաուդոնին, ապա նրան սպառնում է տուգանք, ինչպես նաև ընկերություններում որոշակի պաշտոններ զբաղեցնելու արգելք։