168.am-ը գրում է․
Կառավարության այսօրվա նիստից հետո լրագրողները Առողջապահության նախարար Անահիտ Ավանեսյանին հարցրեցին, թե արդյոք Առողջապահության նախարարությունն ունի՞ լիազորություններ դիմելու Առողջապահության համաշխարհային կազմակերպությանը՝ շրջափակված Արցախում գտնվող քաղաքացիների առողջական խնդիրների մասին բարձրաձայնելու և դրանց լուծումներ տալու համար։
«Իհարկե ունի, իհարկե դիմել ենք, ամենօրյա կապի մեջ ենք նաև օպերատիվ իրավիճակը, պացիենտների վերաբերյալ տվյալները հաղորդելու և գործարկում ենք բոլոր մեխանիզմները, որպեսզի միջազգային կառույցներն իրենց մանդատի շրջանակներում անեն հնարավորինս՝ թե առողջական, թե հումանիտար այս ճգնաժամն ուղղելու առումով։
Պետք է ասեմ, որ և Կարմիր խաչի, և ԱՀԿ-ի հետ մենք ամենօրյա գործակցության մեջ ենք, և պացիենտների տեղափոխության հետ կապված էլ Կարմիր խաչն ակտիվ ընդգրկված է գործընթացներին։
Այս պահին Հայաստանում գտնվող արցախցի պացիենտների առողջական վիճակը բավարար է, նրանք ստանում են անհրաժեշտ բուժօգնություն, իհարկե, բոլոր միջոցները կիրառում ենք հնարավորինս լուծումներ տալու դեղորայքային և այլ բժշկական նշանակության ապրանքների ապահովվածության մասով»,- ասաց Անահիտ Ավանեսյանը։
Նա նաև տեղեկացրեց, որ այս պահին Արցախի բուժհաստատություններում կան ծանր վիճակում գտնվող պացիենտներ, որոնք գտնվում են վերակենդանացման բաժանմունքներում, և ըստ հնարավորության և անհրաժեշտության կազմակերպում են նաև նրանց տեղափոխումը Հայաստան։