Թայվանի իշխող Դեմոկրատական առաջադիմական կուսակցության կործանարար գործողությունները և օտար քաղաքական ուժերի քողի տակ կղզին մայրցամաքային Չինաստանից մեկուսացնելու նրա փորձերը կարագացնեն Թայվանի վարչակազմի ղեկավար Ցայ Ին Վենի կառավարման տապալումը և տարածաշրջանը խորը ճգնաժամի մեջ կգցեն:

Ինչպես գրում է ՏԱՍՍ գործակալությունը, այս մասին հայտնել է Չինաստանի Պետխորհրդին կից Թայվանի գործերով գրասենյակի պաշտոնական ներկայացուցիչ Մա Սյաոգուանգը։

«Մենք նախազգուշացնում ենք Ցայ Ին Վենին և Դեմոկրատական առաջադիմական կուսակցությանը, որ նրանց սադրանքները՝ ապահովելու Թայվանի այսպես կոչված անկախությունն օտար ուժերի աջակցությամբ..., ի վերջո, կարագացնեն կղզու ներկայիս ղեկավարության փլուզումը, ինչպես նաև կգցեն տարածաշրջանը մեծ աղետի մեջ»,- ասվում է տարածված հաղորդագրությունում։

«Ո՛չ մի մարդ, ո՛չ մի քաղաքական ուժ չպետք է թերագնահատի այն վճռականությունը, որով Չինաստանը կպաշտպանի ինքնիշխանությունն ու տարածքային ամբողջականությունը»,- հավելել է Մա Սյաոգուանգը։

ՏԱՍՍ-ը հավելում է, որ Չինաստանի փոխարտգործնախարար Սի Ֆենը կանչել է ՉԺՀ-ում Միացյալ Նահանգների դեսպան Նիկոլաս Բերնսին և հայտարարել, որ Վաշինգտոնը պետք է վճարի ԱՄՆ Ներկայացուցիչների պալատի խոսնակ Նենսի Փելոսիին Թայվան այցելելու թույլտվության համար։

«Միացյալ Նահանգները պետք է վճարի իր սխալների համար: Չինաստանը կձեռնարկի անհրաժեշտ միջոցներ՝ վճռականորեն հակազդելու համար, և մենք կպահենք մեր խոստումը», - Սի Ֆենի խոսքերն է մեջբերում «Սինհուա» գործակալությունը։

Չինացի դիվանագետը նշել է, որ յուրաքանչյուրը, ով կփորձի շահարկել Թայվանի հարցը հանուն քաղաքական կապիտալի, ի վերջո ձախողվելու է և «գամվելու պատմության ամոթալի սյունին»։

Հիշեցնենք, որ երեքշաբթի երեկոյան ԱՄՆ Կոնգրեսի Ներկայացուցիչների պալատի նախագահ Նենսի Փելոսիի օդանավը վայրէջք է կատարել Թայպեյի օդանավակայանում։ Չինաստանը հայտարարել է, որ Փելոսիի այցը Թայվան Չինաստանի ինքնիշխանության և տարածքային ամբողջականության լուրջ խախտում է։

Նախօրեին Չինաստանի ԱԳՆ պաշտոնական ներկայացուցիչ Չժաո Լիցզյանը հայտարարել էր, որ Չինաստանի իշխանություններն արդյունավետ ուժ կկիրառեն Փելոսիի Թայվան այցի դեպքում։

«Եթե Փելոսին այցելի Թայվան, դա կլինի կոպիտ միջամտություն Չինաստանի ներքին քաղաքականությանը... և կհանգեցնի շատ լուրջ հետևանքների: Չինաստանի Ժողովրդաազատագրական բանակը ձեռքերը ծալած չի նստի», - ընդգծել էր նա ճեպազրույցում։

Դիվանագետի կարծիքով՝ Փելոսիի այցը Թայվան ապակայունացնի իրավիճակը Թայվանի նեղուցում և հարված կհասցնի Չինաստան-ԱՄՆ հարաբերություններին։

Չինաստանը Թայվանն իր նահանգն է համարում և դեմ է նրա ներկայացուցիչների և այն երկրների իշխանությունների միջև ցանկացած շփման, որոնց հետ Պեկինը դիվանագիտական հարաբերություններ է հաստատել։

Թայվանի հարցը Վաշինգտոնի և Պեկինի հարաբերություններում առանձնակի կարևորություն է ձեռք բերել Ուկրաինայում ստեղծված իրավիճակի ֆոնին։ ՉԺՀ-ն ընդգծում է, որ պատմական և քաղաքական պատճառներով նմանություններ տեղին չեն, և պահանջում է չմիջամտել ներքին գործերին։ ԱՄՆ-ը, պաշտոնապես պահպանելով «մեկ Չինաստանի սկզբունքը» և չունենալով դիվանագիտական հարաբերություններ Թայպեյի հետ, ոչ միայն կապեր է պահպանում կղզու հետ, այլև պարբերաբար զենք է մատակարարում այնտեղ։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել