Հայաստանի շուրջը ինտենսիվ զարգացումներ են։ Հազարից ավելի ադրբեջանցի զինվորներ դեռ մեր երկրի տարածքում են, ադրբեջանցիները փակել են դեպի Հայաստանի հարավ տանող ճանապարհը, ադրբեջանական ինքնաթիռներն են թռնում Հայաստանի վրայով, Իրանը զորավարժություններ է անում, Ադրբեջանն ու Թուրքիան՝ նույնպես, Ռուսաստանը 3+3 ֆորմատ է նախապատրաստում, եւ գրողի ծոցն ուղարկում Մինսկի խումբը։
Այս ամենը Հայաստանի վերաբերյալ է եւ Հայաստանի շուրջ։ Իսկ այն, ինչ կատարվում է Հայաստանում, կարծես թե ոչ մի կապ չունի այս ինտենսիվ զարգացումների հետ։ Հայաստանում տեսնում ենք թեւերը քշտած պաշտոնյաների, ովքեր սրսկվում են, ընդդիմության, որը ինչ-որ հարցեր է տալիս պատերազմի մասին, իսկ պատերազմը քաղաքական գործոնից աստիճանաբար վերածվում է հեռավոր պատմական իրողության։
Հայաստանը դարձել է պարսատիկի քար, որին ուղղություն եւ արագացում են հաղորդում արտաքին ուժերը, իսկ ներքին ուժերը մատաղացու ոչխարի հեզությամբ սպասում են, թե իրենց ով եւ երբ է զոհաբերելու։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել