Aysor.am-ը գրում է.
«Կարծում եմ՝ խաղաղապահ առաքելությունը կերկարաձգվի այն պարզ պատճառով, որ դժվար թե 2025 թվականին հակամարտությունը կարգավորվի։ Իսկ խաղաղապահ առաքելությունը սովորաբար դադարեցնում է իր աշխատանքը, եթե հակամարտությունը կարգավորված է համապարփակ ձևով։ Եթե կարգավորված չէ, այդ դեպքում ի՞նչ տրամաբանություն կա՝ խաղաղապահ առաքելություն բերել, տեղակայել ընդամենը 4 տարով, 5 տարով, եթե նույնիսկ այդ ժամանակահատվածում նույնպես կարգավորված չի լինելու հիմնախնդիրը։ Հետևաբար, պետք է պարզապես աշխատենք, ճիշտ աշխատենք, հնարավորինս նվազեցնենք էմոցիաները, սառնասրտորեն մոտենանք, գործերին պրոֆեսիոնալ մոտենանք, որպեսզի կարողանանք մեզ համար ցանկալի ձևով արդյունք ձևավորենք», - «Ազատություն» ՌԿ-ի հետ զրույցում ասել է Արցախի ԱԳ նախարար Դավիթ Բաբայանը՝ անդրադառնալով Արցախում ռուսական խաղաղապահ զորակազմի առաքելության երկարաձգման հնարավորությանը։
Ադրբեջանի հայտարարությունը, թե հակամարտությունը կարգավորված է, և ռուսական զորակազմը ժամանակավորապես է տեղակայված Արցախում, Դավիթ Բաբայանի կարծիքով՝ ընդունելի չէ ԵԱՀԿ Մինսկի խմբի եռանախագահության համար։
«Ե՛վ Ռուսաստանը, և՛ ԱՄՆ, և՛ Ֆրանսիան ամենաբարձր մակարդակով իրենց հայտարարություններում խոսել են Արցախի կարգավիճակի մասին՝ տարբեր համատեքստերում և նշել են, որ կարգավիճակի հարցը դեռևս լուծված չէ՝ սրանով իսկ ուղղակիորեն ընդգծելով, որ Արցախը Ադրբեջան չէ, որ կարգավիճակի հարցը դեռ պետք է լուծվի», - ասել է Արցախի ԱԳ նախարարը։
Նա, սակայն, ակնհայտ է համարել, որ երկար ժամանակ լուծման սպասող Արցախի կարգավիճակի բարդ խնդիրը 2-3 տարում լուծվել չի կարող՝ հատկապես հաշվի առնելով Ադրբեջանի անփոփոխ քաղաքականությունը։ Այս պայմաններում միջազգային հանրությունը, Դավիթ Բաբայանի խոսքով, պետք է նաև հստակ պատկերացնի, որ Արցախի գոյությունը Ադրբեջանի կազմում՝ ցանկացած կարգավիճակով, պարզապես անհնար է։
Ամբողջական հոդվածը կարող եք կարդալ այստեղ:
