Armeniasputnik.am-ը գրում է.
Ամռան տապին հաճախակի ջրանջատումներն ու ուշացած զգուշացումները «Վեոլիա ջուր» ընկերության անփութության և թերի աշխատանքի հետևանքն են։ Sputnik Արմենիայի հետ զրույցում նման կարծիք հայտնեց ջրաբան, ջրային փորձագետ Քնարիկ Հովհաննիսյանը։
Նրա խոսքով` չնայած լինում են դեպքեր, երբ ընկերության աշխատակիցներն իրենք էլ չեն կարող նախապես կանխատեսել սպասվող վթարները, սակայն դա որևէ կերպ չի արդարացնում ընկերության գործելաոճը։
««Վեոլիա ջուր» ընկերությունը պարտավորվել է պատշաճ ջրամատակարարում իրականացնել, բնակչությանը խմելու ջրով ապահովել և, եթե ինչ-ինչ պատճառներով թերացել է` պարտավոր է նաև դրանից բխող բոլոր հետևանքները ժամանակին վերացնել»,- ասաց նա։
Հովհաննիսյանի կարծիքով` մինչև հիմնական խնդրի կարգավորումը ընկերությունը պետք է «տուժած» քաղաքացիներին գոնե սանիտարական նվազագույն նորմերին համապատասխան անհրաժեշտ ջրով ապահովի` ցիստեռներով կամ 5-10 լիտրանոց տարաներով ջուր բաժանեն մարդկանց։
Հովհաննիսյանի դիտարկմամբ` ծորակից պղտոր կամ ժանգոտած ջրի հոսքը կարող է խողովակաշարում առկա փոքրիկ խնդրի հետևանք լինել, անհրաժեշտ է դրանք ժամանակին հայտնաբերել ու խնդիրը լուծել, հակառակ դեպքում հետևանքները կարող են անդառնալի լինել։
«Խողովակները շատ հին են և պետք չէ զարմանալ, երբ ծորակից ժանգոտած ջուր է հոսում։ Հնարավոր է, որ դա մի փոքրիկ ճաքի հետևանք լինի, որը կարելի է եռակցման միջոցով կարգավորել, իրենք ունեն ցանկացած տեխնիկա առանց քանդելու ջրագծի խողովակաշարը ստուգելու համար։ Ցավալին այն է, որ խնդիրը չկարգավորելու դեպքում խմելու ջուրը կարող է աղեստամոքսային հիվանդությունների պատճառ դառնալ»,- հավելեց Հովհաննիսյանը։
Հիշեցնենք`այսօր Քանաքեռ-Զեյթուն վարչական շրջանի աշխատակազմը Facebook սոցիալական ցանցում հայտարարություն էր տարածել` տեղեկացնելով, որ առավոտից վարչական շրջանի մի քանի բնակիչներից ահազանգ են ստացել, որ ծորակի ջուրը պղտոր է կամ ժանգագույն:
Համապատասխան աշխատակիցները կապվել են «Վեոլիա ջուր» ընկերության հետ, փոխանցել ահազանգը: Վարչական շրջանի ղեկավարի հրահանգով կասեցվել է շրջանի մանկապարտեզների աշխատանքը:
