«Տառապանքը փորձ ունի…»
Անկախությունից ի վեր տեղեկատվական դաշտում թևածող կիսաճշմարտությունները, նաև երևույթների և անհատների վերաբերյալ տարածված կեղծիքները միահյուսվել են վերջին տարիների զավեշտալի, անտրամաբանական ու խելագարական խառը ստերի հետ:
Այդպիսով դրանք քայքայել են Հայ հասարակության ենթագիտակցական հավաքական դիմադրողականությունն ու ինքնապահպանման բնազդը:
Հետևանքն այն է, որ ժողովուրդն անգիտակցաբար և ինքնուրույն խարխլել է ազգի, պետության, հետևաբար նաև` իր ֆիզիկական ու գաղափարական գոյության հիմքերը:
Հավաստի և ճշգրիտ տեղեկատվության ստացումը, մատուցումն ու տարածումը եղել է, կա և լինելու է ոչ միայն ցանկացած երկրի արդյունավետ կառավարման, այլև՝ ազգային և պետական անվտանգության ապահովման կարևորագույն և առաջնային գործիք։
Հաջողության հասնելու պարտադիր պայման է՝ հասարակությանը իրողությունները փաստարկված ճշգրիտ ներկայացնող տեղեկատվությամբ ապահովելը: Այդ նպատակով կարևորագույն խնդիրների շարքում պետք է ներառել հավաստի տեղեկատվության ստացման, դրանց մատուցման և տարածման գործող ողջ համակարգի վերանայումը։
Անհրաժեշտ է հիմնադրել իրական և հիմնավորված փաստերին հասարակությանը իրազեկելու և տեղեկացնելու պետական կազմակերպված համակարգ։
Պետք է կարճ ժամանակում հասնել նրան, որպեսզի սուտը, կեղծիքը, բանսարկությունը, զրպարտությունը, իրականության ու փաստերի խեղաթյուրումը, և դրանց հիման վրա հայ հասարակության լայն շերտերի մանիպուլացումը այլևս դառնա գործնականում անհնարին։
Պետք է վերջնական և անվերադարձ փակել ստի և կեղծիքի իշխանության էջն ու ստեղծվելիք համակարգով կանխել դրա վերարտադրության ցանկացած փորձ։
Այլևս մի ստեք, մի հավատացեք ստին, և շատ կարճ ժամանակում ամեն ինչ լավ կլինի։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել