Ի՞նչ է լինում, երբ մի ֆիլմի շուրջ միավորվում են երկու հանճարեղ դերասաններ: Այո, կրկնակի հանճարեղ ֆիլմ: «Արթնացում» ֆիլմն արդեն 23 տարեկան է, բայց մինչև այսօր շարունակում է մնալ լավագույն ֆիլմերի ցուցակում: Այն չի հնանում և կինոդիտողի հիշողության մեջ է մնում եթե ոչ ընդմիշտ, ապա շատ երկար: Ֆիլմը դիտելիս մտածում էի. «Իսկ եթե Ռոբին Ուիլյամսի և Ռոբերտ դե Նիրոյի փոխարեն այլ դերասաններ լինեին, արդյո՞ք ֆիլմը նույնքան սիրված կլիներ»: Պատասխան այդպես էլ չկարողացա գտնել: Ֆիլմից չես կարողանում չազդվել նաև այն պատճառով, որ այն հիմնված է իրական փաստերի վրա: Այն շոշափում է մարդկային փոխհարաբերությունների բազում կողմեր՝ նվիրվածություն, կարեկցանք, սեր, հավատարմություն, հավատ: Ֆիլմի մասին գրեթե ոչ մի տեղ չեք գտնի բացասական կարծիք, բայց իմ կողմից կավելացնեմ երևի թե միակ մինուսը՝ տեղ-տեղ ֆիլմը ձանձրացնում է: Բայց ընդհանուր առմամբ փայլուն ֆիլմ է, խորհուրդ եմ տալիս բոլորին:
