PanARMENIAN.Net-ը գրում է․
Թուրքիայի նախկին վարչապետ Ահմեդ Դավութօղլուի կարծիքով երկրի նախագահ Ռեջեփ Թայիփ Էրդողանն աշխարհի համար կորոնավիրուսից էլ վտանգավոր է, փոխանցում է The National News-ը:
«Թուրքիայի նախագահ Ռեջեփ Թայիփ Էրդողանն ավելի մեծ վտանգ է ներկայացնում աշխարհի համար, քան կորոնավիրուսի համավարակը: Եվրոպայի և աշխարհի համար ամենամեծ վտանգը բռնապետությունն է, որը տարածում են պոպուլիստ առաջնորդները, ինչպիսին պարոն Էրդողանն է»,- հայտարարել է Դավութօղլուն:
Թուրքիան Էրդողանի կառավարման շրջանում ակտիվորեն ներգրավվել է տարածաշրջանային կոնֆլիկտներում։ Ներկայումս ռազմական օժանդակությամբ այդ երկիրը միջամտում է նաև Արցախի դեմ Ադրբեջանի սանձազերծած պատերազմին։ Թուրքիան նաև տարածաշրջան է բերել լիբիացի ու սիրիացի վարձկան-ահաբեկիչների։
Դավութօղլուն 2003-2009թ. զբաղեցրել է Էրդողանի գլխավոր խորհրդականի պաշտոնը, 2009-2014-ին եղել է Թուրքայի արտաքին գործերի նախարար, իսկ 2014-2016թթ. զբաղեցրել է երկրի վարչապետի պաշտոնը:
