Hraparak.am-ը գրում է.
«Բարի, կամեցող, ընկերասեր, հայրենասեր, պայքարող ու խիզախ». այսպես են հիշում ընկերները Հրայր Եգանյանին. «Մեր ու ձեր միջի ամենալավ գծերի ամփոփումն էր ինքը»: 30-ամյա Հրայրը զոհվեց արցախաադրբեջանական թեժ մարտերում՝ հոկտեմբերի 18-ին:
Բարձրագույն կրթություն ստացած երիտասարդն ընդամենը երկու ամիս է, ինչ ամուսնացել էր, բայց երիտասարդ կնոջ հետ ամուսնական կյանքը վայելելու փոխարեն նախընտրեց հայրենիքի պաշտպանությունը:
Պատերազմը սկսվելու հաջորդ օրը Հրայրին այլեւս դժվար է եղել տանը պահել, նա շտապել է զինկոմիսարիատ, կամավորագրվել, չի սպասել անգամ մինչեւ իր հերթը կհասնի, մեկ օր հետո ստիպել է իրեն ուղարկել հայրենիքի պաշտպանության գործին.«Կյանքը սիրող, ժպիտը միշտ դեմքին, իր շրջապատը բարությամբ լցնող Հրայրը, սակայն, կյանքից առավել սիրում էր Արցախը: Երազում էր մշտական բնակություն հաստատել այնտեղ»,- պատմում են ընկերները:
«Այնքան էր սիրում, որ միայնակ մորն ու երիտասարդ տիկնոջը տանը թողնելով նետվեց վտանգի մեջ հայտնված Արցախի գիրկը ու ընկավ, իսկապես հերոսի մահով»: