Armenpress.am-ը գրում է.
ՀՀ ազգային ժողովի «Լուսավոր Հայաստան» խմբակցությունը Ֆինանսավարկային և բյուջետային հարցերի մշտական հանձնաժողովի նախագահի թափուր պաշտոնի համար ներկայացրել է Արկադի Խաչատրյանի թեկնածությունը: «Արմենպրես»-ի հաղորդմամբ՝ Խաչատրյանի թեկնածության հարցը ԱԺ-ում ներկայացրեց խմբակցության ղեկավար Էդմոն Մարուքյանը:
Մարուքյանը ներկայացրեց Խաչատրյանի կենսագրությունը՝ հիշեցնելով, որ Մանե Թանդիլյանի մանդատը վայր դնելուց հետո հանձնաժողովի նախագահի պաշտոնը թափուր է մնացել:
Տնտեսական հարցերի մշտական հանձնաժողովի նախագահ Բաբկեն Թունյանը հետաքրքրվեց՝ եթե Խաչատրյանը ընտրվի Ֆինանսավարկային և բյուջետային հարցերի մշտական հանձնաժողովի նախագահի պաշտոնում, ապա ո՞վ կփոխարինի Խաչատրյանին տնտեսական հարցերի հանձնաժողովում: Մարուքյանը պատասխանեց՝ կարծում է, որ որևէ մեկը չի փոխարինելու: «Քանի որ Ստեփան Ստեփանյանը, որը վերցրել է թափուր մնացած մանդատը, արդեն պետաիրավական հարցերի մշտական հանձնաժողովի անդամ է»,-ասաց նա ու հավելեց, որ տնտեսական հարցերի հանձնաժողովում կմնա իրենց խմբակցությունից երկու անդամ:
Արկադի Խաչատրյանը կարևորեց ոլորտային օրենքների նախագծերի բազմակողմանի քննարկումը և պրոֆեսիոնալ եզրակացությունների տրամադրումը հանձնաժողովում, պատասխանեց պատգամավորների հնչեցրած հարցերին:
Հանձնաժողովի նախագահի ընտրության քվեարկությունը տեղի կունենա սեպտեմբերի 15-ին ժամը 12:30-14:00-ն:
