Pastinfo.am-ը գրում է․
Մամուլում շրջանառվող տեղեկատվության համաձայն՝ ԱԱԾ տնօրեն Էդուարդ Մարտիրոսյանը հրաժարականի դիմում է ներկայացրել։ «Փաստինֆո»-ն կապ հաստատեց ԱԱԾ լրատվական ծառայության հետ՝ պարզելու տեղեկատվության ճշմարտացիությունը, որտեղից ասացին, որ այս պահին դեռևս որևէ տեղեկատվություն չունեն։
Նշենք, որ այդ մասին այսօր գրել է 168.am-ը՝ նշելով, որ ԱԱԾ պետ Էդուարդ Մարտիրոսյանը ժողով է անցկացրել ԱԱԾ-ում և հայտարարել է, որ հրաժարականի դիմում է ներկայացրել։ Կայքի տեղեկություններով՝ նրան պետք է փոխարինի ԱԱԾ պետի տեղակալ Արգիշտի Քյարամյանը։
«Փաստինֆո»-ն ավելի վաղ տեղեկացրել էր, որ Էդ.Մարտիրոսյանն ազատվելու ցանկություն ունեցել է դեռ Քյարամյանի նշանակման ժամանակ, ինչի մասին նա իմացել էր նշանակումից հետո։ Ավելին՝ մի շարք փորձառու կադրեր արդեն իսկ դիմումներ գրել են՝ համակարգից դուրս գալու համար։
Կադրերի արտահոսք է նկատվում նաեւ ՊԵԿ-ում, որի նախագահ Դավիթ Անանյանը հրաժարական տվեց երկու օր առաջ։
