Չինական Տունցզիի բժշկական քոլեջի եւ Ուհանի գիտության ու տեխնիկայի Հուաժոնգ համալսարանի գիտնականները փորձել են պարզել տղամարդկանց շրջանում կորոնավիրուսից բարձր մահացության պատճառները։
Ինչպես գրում է «Իզվեստիա»-ն, մասնագետները ուսումնասիրել են 331 պացիենտների, այդ թվում՝ 127 տղամարդու եւ 204 կնոջ արյան պլազման: Հետազոտության մասնակիցների միջին տարիքը 45 է եղել: Ինչպես պարզվել է, IgG-հակամարմինների (սրանք իմունային համակարգի կողմից ստեղծված սպիտակուցներ են՝ ի պատասխան վարակի ներթափանցման) խտությունը տարբեր սեռերի հիվանդության ընթացքի թեթեւ կամ միջին աստիճանի վարակված մարդկանց արյան մեջ էական տարբերություններ չունի: Սակայն COVID-19-ի ծանր ընթացքով պացիենտների շրջանում փորձագետները զգալի տարբերություն են արձանագրել՝ կանանց մոտ արտադրվել են 20-25%-ով ավելի շատ հակամարմիններ SARS-CoV-2-ի հանդեպ։
Գիտնականների խոսքերով՝ տղամարդկանց շրջանում կորոնավիրուսից բարձր մահացության պատճառ կարող են հանդիսանալ հորմոնալ միջսեռային տարբերությունները․ երբեմն տղամարդկանց մոտ տեստոստերոնի բարձր մակարդակը կարող է ճնշել իմունային ռեակցիաները, ինչն էլ կարող է ավելի բարձր վարակվածություն առաջացնել:
