Քանի կեղծ պրոֆիլների և տարատեսակ դիանաների թեման ակտուալ է, ևս մեկ թարմ օրինակ ներկայացնեմ, որը համապատասխան ինստիտուտների ֆունկցիոնալ շրջանակներում է, և խնդրանքս է, որ այս թեմայի ուղղությամբ ևս աշխատեն։
Արդեն մի քանի ամիս է, ինչ հայաստանյան խմբերում ջարդված պրոֆիլների միջոցով կեղծ լուրեր են շրջանառվում։ Տարբեր ջարդված օգտատերեր, որոնք կառավարվում են ադրբեջանցիների կողմից Հայաստանի և Արցախի ներքաղաքական իրավիճակի, դրա սրացման, հասարակական հարաբերությունների խաթարման, հայաստանցի-ղարաբաղցի կեղծ օրակարգի շուրջ, ներքին թշնամության առաջացման կամ խորացմանն ուղղված գրառումներ են տարածում։
Ինչևէ, արդեն մի քանի ամիս է՝ տարբեր խմբերում ընկերոջս անունից (ու ոչ միայն նրա) կեղծ լուրեր են շրջանառվում։ Բոլոր տեղերում գրառումը նույն է՝ փողոց դուրս գալու և Նիկոլ Փաշինյանի դեմ հանրահավաքներ անելու կոչ։
Ամեն անգամ գրում ենք ադմիններին, փորձում խմբերում կանխել ադրբեջանցիների կեղծ լուրերի տարածումը, սակայն խմբերի ադմինների ճնշող մեծամասնությունը չի արձագանքում։
Գրառման տակ մեկնաբանություններ թողնելն էլ առանձնապես արդյունավետ չէ։ Սա համալիր լուծում պահանջող խնդիր է։ Երեկվա օրինակը այս խմբում է՝ Լուրեր Հայաստանից | Новости Армении | Armenian News։
Այս օգտատիրոջ պրոֆիլն էլ ջարդված է, անձամբ եմ գրել, պատասխանել է ադրբեջանցի, պատասխանը սքրինով կդնեմ ներքևում։
Խնդրանքս է տեղեկատվական անվտանգության թեմաներով զբաղվող կառույցներին զբաղվել նմանօրինակ անվտանգային խնդիրներով, նման դեպքերը կանխել վաղ փուլում, ինչպես նաև տեղեկատվական անվտանգության սկզբունքների, դրանց ռիսկերի վերաբերյալ հանրային իրազեկման արշավներ իրականացնել։
