168.am-ը գրում է.
ԱԺ «իմ քայլը» խմբակցության պատգամավոր, Ապրիլյան պատերազմի հանգամանքներն ուսումնասիրող խորհրդարանական քննիչ հանձնաժողովի նախագահ Անդրանիկ Քոչարյանի խոսքով՝ գործընկերոջ՝ Հայկ Սարգսյանի նախագիծը՝ պարտադիր զինվորական ծառայության վերաբերյալ, դեռ պետք է երկար ճանապարհ անցնի և դրվի քննարկման:
«Ասեմ, որ շրջանառության մեջ դրված է մեկ այլ գաղափար, որի համահեղինակը նաև ես եմ, որտեղ մենք առաջարկում ենք բավականին խստացված իրավական կարգավորումներ 27 տարին լրացած և ծառայություն չանցած մեր քաղաքացիների համար: Առաջարկել ենք այնպիսի մեխանիզմներ, որոնք, մեր պատկերացմամբ, լուծելու են շատ համակարգային խնդիրներ, ինչպիսիք են առաջնագծի լուրջ փոփոխությունները, որոնք կբերեն որակական փոփոխություների»,- շեշտեց նա:
Հարցին՝ մտավախություններ չունե՞ք, որ բոլորը կարող են վճարել 10 մլն դրամ և խուսափել ծառայությունից, նա պատասխանեց, որ Հայկ Սարգսյանի նախագիծը դեռ չի քննարկում, ճիշտ է, այնտեղ կան հետաքրքիր տարրեր, բայց դա դեռ չի նշանակում, որ դրանք ամբողջական են:
«Երբ օրենքը գա քննարկման, դուք այստեղ դրա մասին կլսեք»,- եզրափակեց Անդրանիկ Քոչարյանը:
Հիշեցնենք, որ Հայկ Սարգսյանն առաջարկում է նախագիծ, ըստ որի՝ այն անձինք, որոնք խուսափում են զինվորական ծառայությունից, վճարեն 10 մլն դրամ, մեկ ամսում սովորեն զինվորական հմտությունները և ստանան զինվորական գրքույկ:
