Pastinfo.am-ը գրում է.
Երևանի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ ընդհարում տեղի ունեցավ Յուրի Խաչատուրովի պաշտպան Միհրան Պողոսյանի և դատախազ Գևորգ Բաղդասարյանի միջև։
Միհրան Պողոսյանը, միանալով Հովհաննես Խուդոյանի՝ դատախազ Կարեն Բիշարյանին բացարկ ներկայացնելու միջնորդությանը, նշեց, որ Կարեն Բիշարյանը ոչ թե առաջնորդվում է օրենքով, այլ որոշակի քաղաքական պահանջներին համահունչ գործողություններ է կատարում. «Կարեն Բիշարյանը կա՛մ 2018 թվականի փետրվարի 23-ին է քաղաքական պատվեր կատարել՝ հայտարարելով, որ որևէ հանգամանք չկա, կա՛մ հիմա է քաղաքական պատվեր կատարում։ Երկու պարագայում էլ պարոն Բիշարյանը չի գործում օրենքների և դատախազության մասին օրենքով սահմանված կարգով»,-նշեց Միհրան Պողոսյանը։
Դատախազ Գևորգ Բաղդասարյանը ցանկացավ առարկել, որին ի պատասխան՝ Միհրան Պողոսյանը հորդորեց չընդհատել իրեն, ինչի հետևանքով ընդհարում տեղի ունեցավ։
«Հարգելի դատարան օրենքով սահմանված կարգ է՝ առարկել դիմացինի գործողությունների դեմ։ Ի՞նչ է նշանակում դու ինձ մի ընդհատիր։ Կկտրեմ ձենդ՝ չես մոռանա»,-ասաց դատախազը։
Դատավորն ընդմիջում հայտարարեց, որից հետո հնարավորություն տվեց Միհրան Պողոսյանին և Գևորգ Բաղդասարյանին արտահայտվել իրենց վարքագծի կապակցությամբ։