Hayeli.am-ը, հղում անելով «Ժողովուրդ» օրաթերթին, գրում է․ ««Մարտի 1»-ի գործով մեղադրվող նախկին ոստիկանապետ Ալիկ Սարգսյանը «Ժողովուրդ» օրաթերթի հետ զրույցում ասել է, թե մեղադրանքի առաջադրումից ավելի քան 1 ամիս անց լուր չունի նախաքննական մարմնից: Ասել է` նպատակը հեռուստաշոուն էր եւ մեկ էլ, որ ինքը երկրից չհեռանա:
«Ոնց որ օրը բռնացրին, կանչեցին ու նսեմացրին. հենց այսօր ստորագրություն տվե՛ք չհեռանալու մասին: Գիտեին, որ առավոտյան տեղ էի գնում: 1200 հոգանոց հարսանիքի քավոր էի, ոչ ավել, ոչ պակաս, փեսացուն`աշխարհի չեմպիոն, նորմալ շրջապատի մարդիկ»,- ասել է նախկին ոստիկանապետը:
Մեկնաբանելով «Ժողովուրդ» օրաթերթի տեղեկությունները, որ քրգործը հարուցվել է իր նախկին գործընկերոջ՝ Հովհաննես Թամամյանի ցուցմունքից հետո, ու հենց Թամամյանին ավելի մեղմ մեղադրանք է առաջադրվել, Ալիկ Սարգսյանն ասել է. «Ես հիմա միտումնավոր ոչ մեկի հետ որեւէ կապ չեմ տալի, նույնիսկ հեռախոսով չեմ խոսում»:
Անդրադառնալով մեղադրանքում առկա՝ իրեն ցուցումներ տալու հարցին` Ալիկ Սարգսյանն ասել է. «Սերժ Սարգսյանը՝ երկրի նախագահը, ինձ ցուցումներ չի տվել, ո՞նց կարար Գեւորգ Կոստանյանը ինձ գար ասեր`այս թուղթը փոխի, սա սենց արա, թեկուզ սա է ասել, նա է ասել…»»:
Մանրամասները՝ «Ժողովուրդ» օրաթերթի այսօրվա համարում։
