Թուրքիայում տեղի ունեցող բողոքի ակցիաները կարելի է բնութագրել ոչ թե որպես ինչ-որ սոցիալական շերտերի շարժում, այլ` զանգվածային ընդվզում կառավարության դեմ, որին մասնակցեցին բնակչության ամենատարբեր խավերը, հիմնականում` երիտասարդությունը: Այս մասին Aysor.am-ի հետ զրույցում ասաց Արևելագիտության ինստիտուտի տնօրեն, թուրքագետ Ռուբեն Սաֆրաստյանը:
Թուրքագետի կարծիքով` դեռ վաղ է Թուրքիայի ներքին խնդիրների հետ կապված որևէ եզրակացություն անել. «Կարող ենք սպասել, որ տեղի կունենա քաղաքական նոր ուժի ձևավորում»:
Ռուբեն Սաֆրաստյանն Թուրքիայում տեղի ունեցող իրադարձությունների հետ կապված ընդգծեց մի կարևոր հանգամանք, որի վրա, թուրքագետի խոսքով, քիչ ուշադրություն է դարձվել.
«Մինչև այս ընդվզումը, թուրքական մամուլում քարտեզներ տպագրվեցին, որոնք, այսպես ասած, նոր Թուրքիայի քարտեզներն էին: Դրանցում Սիրիայի հյուսիսային մասը մտնում էր Թուրքիայի կազմի մեջ: Այսինքն, Թուրքիայում այդ հարցերը քննարկվում են»,- ասաց նա ու ավելացրեց, որ չպետք է զարմանանք, եթե այս օրերին Թուրքիան սկսի ավելի կոշտ արտաքին քաղաքականություն վարել, մասնավորապես` Սիրիայի նկատմամբ.
«Շատ հավանական է, որ վարչապետ Էրդողանն այս օրերին սրի հարաբերությունները Սիրիայի հետ, որպեսզի մարդկանց ուշադրությունը շեղի Թուրքիայի ներքին հարցերից»:
Ամբողջական հոդվածը կարող եք կարդալ այստեղ
