Շուշիի առանձնակի գումարտակի ազատամարտիկներ բժիշկ Նորայր Շահբազյանը, 3-րդ դասակի հրամանատար Ժորա Ֆարյանը և լրագրող Հակոբ Պողոսյանն այսօրվա մամլո ասուլիսում հայտարարեցին, որ «Կիսաբաց լուսամուտներ» հաղորդման հաղորդավարը և հաղորդման հյուրերը վիրավորել են Շուշիի առանձնակի գումարտակի հետախուզական վաշտի հրամանատար Հովսեփ Աղաբեկյանին:
Բանն այն է, որ «Կիսաբաց լուսամուտներ» հաղորդմանը դիմել է մոտ հիսուն տարեկան մի կին, ով բնակվում է երկրորդ Մասիվի հանրակացարաններից մեկում: Նա հաղորդման ժամանակ հայտարարել է, որ իր հարևանը` ազատամարտիկ Հովսեփ Աղաբեկյանը, իրեն սպառնացել է: «Երկրորդ Մասիվի հանրակացարանին կից տարածքը դարձել է վեճի առարկա: Այդ կինն ապօրինաբար զավթել է այն, դուռ է բացել տվել և ցանկանում է, որ պետությունը տարածքն իրեն տա, քանի որ ինքն ունի հաշմանդամ երեխա: Չի բացառվում, որ տարածքը պետությունը աճուրդի հանի: Եթե նման բան լինի, մենք պատրաստ ենք գումար հավաքելու և մեր ընկերոջ համար այդ տարածքը գնելու, քանի որ նրա երեք երեխաները մեկ սենյակի մեջ են քնում »,- մանրամասնեցին բանախոսները:
Ազատամարտիկներին վրդովեցրել է այն, որ հաղորդավարը և հաղորդման հյուրերից մի քանիսը` որոշ դերասանուհիներ, վիրավորել են Հովսեփին`ասելով «ամոթ նրան, ամոթ, որ նման մարդն ազատամարտիկ է: Դա էլ բավական չէ, բողոքող կինը կասկածի տակ է դրել Հովսեփի ազատամարտիկ լինելը` օգտագործելով «ինչ-որ ազատամարտիկ» բառակապակցությունը:
Բանախոսները նաև հայտնեցին, որ այդ հաղորդման պատճառով ազատամարտիկի կինը կորցրել է իր չորրորդ չծնված երեխային:
Նշենք, որ մոտ քառասուն օր առաջ մահացել է Հովսեփ Աղաբեկյանի մայրը, ով Քալաշյանների տոհմից է: Նրանք հայտնի են աշխարհին հայկական պարն ու հայ մշակույթը տարածող տոհմ:
Հաղորդումը եթեր հեռարձակելուց առաջ «Կիսաբաց լուսամուտների» անձնակազմը զանգահարել է Հովսեփին և նրան հրավիրել` սույն խնդրի հետ կապված մեկնաբանություն տալու համար, սակայն նա հրաժարվել է` ասելով, որ դա իրավական խնդիր է:
Հաղորդումը եթեր հեռարձակելու օրը հաղորդավարը զանգահարում է Հովսեփ Աղաբեկյանի կնոջ և մեկնաբանություն խնդրում սույն հարցի հետ կապված: Վերջինս հրաժարվում է` ասելով, որ իր ամուսինը մեկնել է ՌԴ և ինքն իրավասու չէ պատասխանելու այդ հարցին:
Հաղորդման ավարտից հետո Հովսեփի ազատամարտիկ ընկերները զանգահարում են հաղորդման պատասխանատուներին հայտնում իրենց վրդովմունքը իրենց ընկերոջ հասցեին հնչեցված արտահայտությունների համար, պահանջում նոր հաղորդում պատրաստել, որտեղ ամեն ինչ կներկայացվի օբյեկտիվորեն: «Մեզ ասացին, որ դա կլինի օգոստոսի տասին, որը շատ ուշ է, առաջիկայում պետք է նոր հաղորդում եթեր հեռարձակել, ավելին` Հովսեփին վիրավորած հաղորդավարն ու դերասանուհիները պետք է ներողություն խնդրեն մեր ընկերոջից, հակառակ դեպքում մենք դատի կտանք նրանց»,- եզրափակեցին բանախոսները:
