Մեծ Բրիտանիայում ապրիլի 10-ին մահացել է 44-ամյա ոսկե ձկնիկը՝ Ջորջը, հաղորդում է The Mirror-ը:
Ջորջի տերը՝ Քիթ Էլիսը, 1974թ.-ին նրան մեկ այլ ձկնիկի՝ Ֆրեդի հետ շահել է տեղի տոնավաճառում և նվիրել է ընկերուհուն՝ Մերիին, որի հետ այժմ ամուսնացած է:
Ֆրեդը մահացել է 2017-ին՝ 42 տարեկան հասակում: Նրա մահից հետո Ջորջը սկսել է կորցնել իր ոսկե երանգը և, ի վերջո, դարձել է արծաթագույն, պնդում են ձկների տերերը: Ջորջին թաղել են Ֆրեդի կողքին՝ տան կողքի այգում:
Քիթը և նրա կինը կարծում են, որ ձկների երկարակեցության գաղտնիքը «կանոնավոր ֆիզիկական վարժություններն են, ձկների համար նախատեսված փաթիլներից հատուկ սննդակարգը և ջրի պարբերաբար թարմացումը»:
2015 թ.-ին Ջորջն ու Ֆրեդը ճանաչվել են Մեծ Բրիտանիայի ամենատարեց ոսկե ձկնիկները: Այս տեսակի ներկայացուցիչների կյանքի միջին տևողությունը մոտ 10 տարի է: