Խորը հիասթափված եմ. պարոն վարչապետ, Ձեր թիմը` «վերնախավը», տառապում է կատարյալ դիլետանտիզմով

Անկեղծ եմ եղել երեկ, այսօր ու վաղը... Ես ինձ խոսք էի տվել, որ պարտավոր եմ արտահայտվել, կիսվել իմ մտքերով։

1 տարի անց ուզում եմ վերլուծել նոր իշխանության աշխատանքը, քանի որ ես ու իմ ընտանիքն անձամբ ակտիվ մասնակցել ենք ցույցերին ու նաև խնդրելով մեզ հետ բերել էինք Ազատության հրապարակ ընկերների, հարազատների ու բարեկամների, որոնցից շատերն, անկեղծ ասած, համախոհ ՉԵՆ եղել նորաթուխ լիդերների գաղափարախոսությանն ու թավշյա մոտեցմանը։ Հիմա ՊԱՐՏԱՎՈՐ եմ պահանջատեր լինել ԻՄ ՔԱՅԼԻ համար։ Այո՛, ես սպիտակ վերնաշապիկների հեղինակն եմ եղել, այո՛, ես ցանկացել եմ տեսնել նոր` մի ուրիշ Հայաստան։

Ամենայն անկեղծությամբ ասեմ, որ հիմա խորը հիասթափված եմ։ Երբեք չեմ պաշտպանել ո՛չ Նիկոլ Փաշինյանի շահերը, ո՛չ Սերժ Սարգսյանի շահերը և ոչ մեկի շահերը։ Ես երբեք չեմ եղել քաղաքական կամակատար, գնացել եմ ժողովրդի հետ` հաշվի առնելով նրա կարծիքն ու բողոքը նախկին իշխանության հանդեպ։

Եղել եմ հայրենակիցներիս կողքին և կլինեմ միշտ։ Անկեղծ ասեմ` ես վատ չեմ ապրել և՛ անցյալում, և՛ հիմա (փառք Աստծուն), բայց իմ շուրջն անընդհատ տեսել եմ չքավորություն, խեղճություն, հուսահատություն, ու դա ինձ խորին ցավ է պատճառել: Ես ինչքանով որ կարողացել եմ, փորձել եմ ընդվզել այդ անարդարության դեմ` չառաջնորդվելով «փորս կուշտ է, իսկ տեղս՝ տաք» կարգախոսով։ Բայց հիմա պարտավոր եմ որպես ՀՀ քաղաքացի պահանջել ու ասել՝ ԻՆՉՈ՞Ւ...

Էն, ինչ հիմա կատարվում է, 180 աստիճան հակառակ է մեր ազգային մտածողությանը։ ԻՆՉՈ՞Ւ...

Հրապարակ են գալիս այնպիսի երևույթներ, որոնք սարսափելի վտանգ կարող են հասցնել հայի արժանապատվությանը։ ԻՆՉՈ՞Ւ...

Սորոս-մորոս, ինչ-որ պարգևավճարներ, այլասերվածություններ, ժամանակին հնչեցված ու չկատարված խոստումներ ու չմտածված քաղաքական հայտարարություններ, որոնք, ըստ իս, մեծ վտանգ են ներկայացնում մեր երկրին ու անվտանգությանը։ ԻՆՉՈ՞Ւ...

Պատասխանեք, խնդրում եմ, պարոն վարչապետ...

Ես՝ որպես 3 զավակների պարկեշտ հայր, ով ուզում է ապրել ու արարել իր հայրենիքում և դաստիարակել երեխաներին հայեցի, և նաև որպես հասարակ քաղաքացի, մտահոգված եմ մեր երկրի ներկայով ու ապագայով։ Եվ ուրեմն, պարոն վարչապետ, պնդել եմ ու կրկին պնդում եմ, որ Ձեր թիմը` «վերնախավը», տառապում է կատարյալ դիլետանտիզմով։ Սա ինձ համար սարսափելի է ու անսահման մտահոգիչ։

Ոչ մի ռեալ քայլ ես չեմ տեսել այս 1 տարվա ընթացքում, ոչ մի բարեփոխում գրեթե չի ծառայել իր նպատակին։ Խոստումներ, խոստումներ ու միայն խոստումներ, և ՑԱՎՈՔ, դեռ ՈՉԻՆՉ։

Հարգելիներս, Ձեր ամենակարևոր խնդիրը միասնակամ դարձնելն է հային։ Գրողի ծոցն ուղարկեք սև-սպիտակը։ Մեր հասարակությունն, անկախ իր քաղաքական նախասիրություններից, Ձեր մերձավորներն են, հայ քաղաքացիներն ու գյուղացիները։ Համախմբեք ողջ ազգը մի գաղափարի շուրջ (մենք պատերազմի մեջ ենք)։ Եթե չեք կարող, ուրեմն՝ արժանապատվորեն հրաժարվեք Ձեր բռնած ուղուց, իսկ եթե ոչ, ապա ի մի եկեք ու գործեք բացառապես ի շահ մեր երկրի արժեքների ու գաղափարախոսության (կարծում եմ՝ կարիք չկա Ձեզ հիշեցնելու մեր արժեքների մասին)։ Մենք ունենք մեր նիստն ու կացը, մեր ավանդույթներն ու ադաթները, մեր եկեղեցին ու հավատը։

Դրանք հաշվի առնելով՝ կարգ ու կանոն հաստատեք։ Թքած և՛ Եվրոպայի, և՛ Ամերիկայի, և՛ այլոց արժեքների վրա, քանի որ, իմ խորհին համոզմամբ, նրանք հաստատ, 100%-ով թքած ունեն մեր ազգային մտածողության ու արժեքների վրա։

Սթափվեք, միավորվեք ու խելոք մարդկանցով էս երկիրը, մեր երկիրը շենացրեք ու ծաղկեցրեք, ինչպես և խոստացել էիք, պարոն վարչապետ։ Ինչ որ հիմա կատարվում է, աբսուրդ է, սխալ է, տանում է դեպի պառակտում, քաոս, իսկ հետևանքները հաստատ կործանարար են լինելու։

Սա սուբյեկտիվ կարծիք է, ու ես, ինչպես ցանկացած մարդ, իրավունք ունեմ արտահայտվելու և կիսվելու իմ մտահոգություններով առանց վիրավորելու որևիցե մեկին։

Սա իմ հայրենիքն է նաև, ու ես հաստատ սրտացավ քաղաքացի եմ, ով մտածում է հայրենիքում մնալու, աշխատելու ու իր զավակների վաղվա օրվա մասին։

ՀԳ. Երբեք չեմ ուզել ու չեմ ուզում պաշտոն։ Հորս արև։