Ռուսաստանի ամենահեռավոր ու ցուրտ բնակավայրերից մեկում՝ արկտիկական շրջանում գտնվող Նովայա Զեմլյա բնակավայրում, արտակարգ դրություն է հայտարարվել սպիտակ արջերի ներխուժման պատճառով: Ինչպես նշում է Daily Mail-ը, հիսունից ավելի արջ, ագրեսիվ վարք դրսևորելով, ահաբեկել է մոտ 3 000 բնակիչ ունեցող Նովայա Զեմլյայում ապրողներին:
Գիշատիչները ներխուժել են տներ ու հանրային շինություններ. իշխանությունները նախազգուշացրել են «զանգվածային ներխուժման» մասին: Տեղի իշխանությունների ներկայացուցիչ Ալեքսանդր Մինաևը նշել է, որ մարդիկ վախենում են տնից դուրս գալ, և որ մարդկանց առօրյան կաթվածահար է եղել:
«Ծնողները վախենում են երեխաներին դպրոց ու մանկապարտեզ ուղարկել: Եղել են դեպքեր, երբ կենդանիներն ագրեսիվ վարք են դրսևորել՝ հարձակվելով մարդկանց վրա, ներխուժելով բնակելի ու գրասենյակային տարածքներ»,- մանրամասնել է պաշտոնյան:
Նա նշել է, որ հունվար-փետրվար ամիսներին բնակավայր է եկել 52 բևեռային արջ, որից 6-10-ն անընդհատ գտնվում են բնակավայրում ու, կարծես, վախն ամբողջովին կորցրել են: Բայց քանի որ նրանք համարվում են վերացող տեսակ, մարդկանց արգելված է կրակել և վնասազերծել արջերին:
Թեև Նովայա Զեմլյայից դիմել են Մոսկվա՝ խնդրելով արտակարգ իրավիճակի պայմաններում թույլ տալ սպանել արջերին, սակայն մայրաքաղաքից բացասական պատասխան է ստացվել:
Բևեռային արջերը, դառնալով գլոբալ տաքացման զոհ, ստիպված են ավելի շատ մոտենալ մարդկանց ու փորձել այնտեղ սնունդ հայթայթել: