Newspress.am-ը գրում է.
Ֆրանսիաբնակ Արծրունի Ավետիսյանը վստահեցնում է՝ ՀՀ առաջին նախագահ Լևոն Տեր-Պետրոսյանը հանդիսանում է հոկտեմբերի 27-ին ԱԺ-ում տեղի ունեցած սպանդի գլխավոր հեղինակը։
Նրա որակմամբ՝ առաջին նախագահը ՀՀ թիվ մեկ հանցագործն է։ Արծրունի Ավետիսյանը NEWSPRESS.am-ի հետ զրույցում նկատում է, որ գլխավոր հանցագործին թողած ազատության մեջ՝ վրեժ են լուծում տարբեր մարդկանցից՝ այդ թվում նաև ՀՀ երկրորդ նախագահ Ռոբերտ Քոչարյանից։
«Ես երբեք ո՛չ Քոչարյանի, ո՛չ Լևոն Տեր-Պետրոսյանի, ո՛չ Սերժ Սարգսյանի կողմնակիցը չեմ եղել, բայց չեմ կարող չասել, որ այն, ինչ տեղի է ունենում Քոչարյանի նկատմամբ, քաղաքական հետապնդում է։ Հայաստանում դատական համակարգն անաչառ չէ»,-պնդում է Արծրունի Ավետիսյանը և նկատում, որ այդ մասին հենց վարչապետի ժ/պ Նիկոլ Փաշինյանն ինքն է փաստել։
Ավետիսյանը հիշեցնում է հանրահավաքներից մեկի ժամանակ Փաշինյանի կողմից հայտարարությունը, թե «կա՞ արդյոք մի դատավոր, ով ինձ կարող է հակառակվել»։ Բացի դրանից, Արծրունի Ավետիսյանը վկայակոչում է նաև Ազգային անվտանգության ծառայության, ՀՔԾ պետերի և Նիկոլ Փաշինյանի գաղտնալսումները, որոնք ամիջականորեն ապացուցեցին, որ դատարանների որոշումների վրա անմիջական ազդեցություն կա։
«Հայաստանում ոչ մի դատական գործընթաց անաչառ չէ։ Հատկապես Ռոբերտ Քոչարյանի դեպքում՝ քաղաքական պատվեր է, քաղաքական հետապնդում։ Ես չեմ պաշտպանում, մեղադրում կամ արդարացնում Քոչարյանին, բայց տեսնում եմ, որ բացարձակ խտրականություն է դրվել։ Բացարձակ հովանավորչություն է տեղի ունենում Փաշինյանի կողմից իր կնքահոր՝ Լևոն Տեր-Պետրոսյանի նկատմամբ»,- ասում է մեր զրուցակիցը։
Բացի այդ, Արծրունի Ավետիսյանը հիշեցնում է՝ Փաշինյանն իշխանության գալով՝ առաջին գործով ազատեց Վահան Շիրխանյանին, ով, Ավետիսյանի գնահատմամբ, տեռորիստ է։
«Ես չեմ ուզում փակագծեր բացել և ասել, թե ինչ տեռորի մասին է խոսքը, կարող եմ ասել միայն, որ դա ՀՀ տարածքից դուրս տեռոր է եղել, որը տեղի է ունեցել Տեր-Պետրոսյանի և Վահան Շիրխանյանի գլխավորությամբ։ Այս միջազգային ահաբեկիչներին թողած՝ քաղաքական հետապնդումներով են զբաղված»։
Արծրունի Ավետիսյանը պնդում է, որ ունի բոլոր փաստերը և կարող է հաստատել իր խոսքերը եվրոպական դատարաններում։
Նա հիշեցնում է նաև, որ Վահան Շիրխանյանի ասուլիսներից մեկի ժամանակ լրագրողի դիտարկմանը, թե Արծրունի Ավետիսյանը Ձեր դեմ փաստարկներ է ներկայացրել, Շիրխանյանը պատասխանել է, թե դրանք հորինված, շինծու բաներ են և ասել է, թե չի ճանաչում Ավետիսյանին։
«Ինչպե՞ս կարող է նա ինձ չճանաչել․ բացի այն, որ ես՝ որպես լիազորված անձ, մասնակցում եմ և անմիջական կապ ունեմ ՀՀ բանակաշինության հետ, ու իմ մասին նա գիտի, Շիրխանյանը նաև իմ խնամին է եղել․ նրա ավագ դուստրը՝ Մարինեն, եղել է իմ կրտսեր եղբոր օրինական կինը․․․ Շիրխանյանը գիտի, որ ես գիտեմ իր բոլոր գաղտնիքները ու մերժում է ինձ հետ իր ծանոթության փաստը»,- ասում է մեր զրուցակիցը։
Նա նկատում է, որ Հոկտեմբերի 27-ի գործողություններում Լևոն Տեր-Պետրոսյանի անմիջական մասնակցության մասին շատ հիմնավոր փաստեր կան, ու չնայած այդ մասին բազմիցս գրել է ու հայտարարել, սակայն ոչ ոք չի ուզում արձագանքել դրան։
Միևնույն ժամանակ, Արծրունի Ավետիսյանը ո՛չ հաստատում, ո՛չ էլ բացառում է երկրորդ նախագահ Քոչարյանի մասնակցությունն այդ ոճրագործությանը, պարզապես հայտարարում է՝ գլխավոր դերակատարն այդտեղ Լևոն Տեր-Պետրոսյանն է և ինքն ունի հիմնավոր փաստեր։
Այն, որ Տեր-Պետրոսյանը մինչ օրս հարցաքննության չի կանչվել, նրա համար ունի պարզ պատճառ․ Նիկոլ Փաշինյանը չի ցանկացել, իր կնքահորն ու քաղաքական հորը պատասխանատվության կանչել։
«Փաշինյանը Տեր-Պետրոսյանի «աշակերտն» է ու եթե անգամ Քոչարյանի մասնակցությունը կա, ապա նույնիսկ ո՛չ թե երկրորդական, այլ չորորդական դերերում է»,-վստահեցնում է Արծրունի Ավետիսյանը։
Թե ինչու նա իր փաստերը մինչ օրս չի ներկայացնում ՀՀ իրավապահ մարմիններին ու դատարանին, պատասխանը դարձյալ պարզ է՝ չի վստահում։
«17 տարի ես ՀՀ-ում չեմ ապրում արդեն ու երբ հայտարարեցի, թե ուզում եմ վերադառնալ, իմ նկատմամբ քրեական գործ հարուցեցին և տեղեկացրին, որ հենց օդանավակայանից ինձ կկալանավորեն։ Ես ինչպե՞ս կարող եմ վստահել ՀՀ դատարանին ու իրավապահ համակարգին»,- նկատում է Արծրունի Ավետիսյանը։
Միևնույն ժամանակ ամենայն պատասխանատվությամբ հայտարարում է, որ եթե լինեն մարդիկ՝ հոկտեմբերի 27-ի ողբերգության զոհերի հարազատները կամ շահագրգիռ այլ անձինք, ովքեր կցանկանան դիմել այդ գործի բացահայտման հարցով Եվրոպական դատարան, ապա ինքը մեծ պատրաստակամությամբ Եվրոդատարան կներկայացնի նաև իր ձեռքի տակ ունեցած բոլոր փաստերը։
«Ասել եմ, պնդել եմ, ասում եմ ու վաղը նորից պնդելու եմ, որ Լևոն Տեր-Պետրոսյանը միջազգային ահաբեկիչ է։ Հանուն արդարության չեմ կարող չասել, որ եթե մեծ հանցագործն ազատության մեջ է, ապա Քոչարյանի կալանավորումը պարզապես քաղաքական հետապնդում է»,- ասաց Ավետիսյանը։
