Azatutyun.am-ը գրում է.
«Նոյեմբերի 25-ին Կերչի նեղուցում գերեվարված ուկրաինացի զինվորականները հազիվ թե ազատ արձակվեն մինչև Ծննդյան տոները: Այսօր նման հայտարարությամբ է հանդես եկել Պետդեպարտամենտի` Ուկրաինայի գծով հատուկ ներկայացուցիչ Քուրտ Վոլքերը:
«Ուկրաինացիների համար միակ դրական լուրն այս իրավիճակում Միացյալ Նահանգների, Եվրամիության և ՆԱՏՕ-ի աներկբա աջակցությունն է», - հավելել է նա:
Անդրադառնալով ուկրաինացի ծովայինների սպասվող դատավարությանը՝Վոլքերը նշել է, որ այն չի կարող օրինական ուժ ունենալ, քանի որ զինվորականների ձերբակալությունն ինքնին օրինական չէր:
Ուկրաինական իշխանությունները այսօր տեղեկացրել են, որ գերեվարված ծովայինների շահերը դատարանում պաշտպանելու են 34 փաստաբաններ, որոնց վարձել է պաշտոնական Կիևը: Անդրադառնալով Մոսկվայից հնչող պնդումներին, թե մոտ ապագայում պաշտոնական Կիևը կարող է սադրանքների դիմել Դոնեցկի և Լուգանսկի ինքնահռչակ հանրապետությունների դեմ՝ ԱՄՆ պետդեպարտամենտի ներկայացուցիչը նշել է․ - «Ես կարծում եմ, որ այդ ենթադրությունների հեղինակները ռուսամետ ուժերն են, որոնց նպատակը ուշադրությունը շեղելն է»:
