Ողջույն նախընտրական եռուզեռով կամա-ակամա ապրող, ընտրակաշառքներից, ընտրությունների ծախված լինելուց հավերժ դժգոհ, բայց միևնույն ժամանակ 10000-ից չհրաժարվող հայ ժողովուրդ :) Գիտեմ, որ ամեն պահ քեզ են հրամցնում այս կամ այն կուսակցությունների, քաղաքական գործիչների փնովող ու նրանց խոսքերը կեղծ համարող տարբեր «փաստաթղթեր» և ապացույցներ: Եկեք խելացի գտնվենք և ընդանրացնենք բոլորի տրամադրած տեղեկությունները: Եվ այսպես, ցանկացած կուսակցություն իր պարտքն է համարում կեղծ համարելու մնացած բոլոր կուսակցությունների նախընտրական խոստումները: Ուստի հավատալով բոլորին անխտիր, կարող ենք գալ մի ճշմարտության, այն է՝ ԲՈԼՈՐՆ ԷԼ ՍՏՈՒՄ ԵՆ: Բայց ես այսօր քեզ հետ չեմ վարվելու, ինչպես մի լրագրող և քեզ չեմ ձանձրացնելու մի կուսակցութանը սրբացնող ու մյուսների վրա աղբ նետող երկար-բարակ հոդվածով: Ոչ:) Ես այսօր փորձելու եմ օգնել քեզ հասկանալ, թե ո՞ր քաղաքական գործիչն է ավելի քիչ ստում, քան՝ մյուսները: 20-րդ դարի 60-ական թվականներին Ալբերտ Մեհրաբյանը հաստատեց, որ ինֆորմացիայի փոխանցումը իրականացվում է վերբալ միջոցներով. միայն բառերով՝ 7%, ձայնային միջոցներով՝ 38%, ոչ վերբալ միջոցներով՝ 55%: Ինչպես տեսնում ես, մարդն իր խոսքի միայն մի մասն է արտահայտում բառերով, ինչը վերահսկել կարող է, ուստի ստելու հավանականությունը մեծ է: Իսկ իր ասելիքի 55%-ը արտահայտում է ոչ վերբալ միջոցներով (ժեստիկուլացիա, միմիկա և տարածության մեջ մարնի դիրքի ընտրություն), որն ահա կատարում է հիմնականում ենթագիտակցաբար: Քեզ եմ ներկայացնում կինետիկ (ոչ վերբալ) լեզուն հասկանալու մի քանի օգտակար խորհուրդներ: Հուսով եմ նրանք քեզ կօգնեն ճիշտ ընտրություն կատարելու հարցում.
ԱԳՐԵՍՈՐԻ ԳԼԽԻ ԴԻՐՔ-ագրեսիվ մարդու տպավորություն են թողնում այն ժամանակ, երբ կզակը մի քիչ մոտ է կրծքին, իսկ հայացքը՝ կարծես թե ունքի տակից է: Գոյություն ունեն մարդկանց մի որոշակի խումբ, որոնք առանց ագրեսիայի չեն կարող պարզապես ապրել: Եթե նրանց շրջապատում չկա ագրեսիայի աղբյուր, ապա նրանք այն ստեղծում են ստիպողաբար: Դա կարող է լինել նրանց կամքից անկախ:
ՈւՆԿՆԴՐԻ ԳԼՈՒԽ- այսպիսի կեցվածք են ընդունում այն մարդիկ, որոնց գլուխը մի փոքր կողք է, մի փոքր առաջ և մի փոքր էլ ներքև թեքված: Այսպիսի կեցվածքը խորհրդանշում է հարգանք. «ես ձեզ ուշադիր լսում եմ, ես հարգանքով եմ վերաբերվում ձեզ»:
ՆԱԽԱԳԱՀԻ ԳԼՈՒԽ- այս դեպքում գլուխը մի փոքր կողք է թեքված լինում, ինչպես «ունկնդրի գլուխը», բայց և հպարտորեն ետ է գցված, ճիշտ ինչպես «տիրակալինը»: Հետ թեքված գլուխը մյուսների նկատմամբ առավելություն ունենալու նշան է, ինքնավստահության վկայություն: Այս գլուխն ավելի շատ ասում է. «ես համակ ուշադրությամբ ձեզ եմ լսում», սակայն մյուս կողմից էլ ավելացնում է. «բայց մի մոռացեք, թե ես ով եմ»:
ՏԻՐԱԿԱԼԻ ԳԼԽԻ ԴԻՐՔ- Այսպիսի կեցվածք ընդունող մարդը գլուխը միշտ հետ է պահում: ի ցուց դնելով շնչափողը. դա նշանակուշ է, որ նա չի վախենում: Այսպիսի կեցվածք ունեցող մարդուն անվանում են՝ «ինքնահավան տեսքով», «իր մասին մեծ կարծիք ունի», այսինքն՝ շատ վստահ է ինքն իր վրա. արտահայտում է ուրիշների նկատմամբ արհամարանք, իրեն զգում է տեր, տիրակալ:

Հուսով եմ, այս փոքրիկ նրբությունները քեզ կօգնեն ճիշտ ընտրություն կատարել: Հիշիր, որ ցանկացած ժողովուրդ ունի այն ղեկավարը, որին արժանի է :)

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել