Թուրքիայի իշխող կուսակցության՝ Մալաթիայից ընտրված պատգամավոր Օմեր Ֆարուք Օզը ծիրան է ուղարկել Հոլիվուդ: Մայիսի 21-ին այս մասին հայտարարել է պատգամավորը: Այս մասին գրում է hurriyetdailynews.com-ը:
Մալաթիայի ծիրանը Օզը հասցեագրել է կրծքագեղձի հետվիրահատական շրջանում գտնվող դերասանուհի Անջելինա Ջոլիին: Մալաթիայի ծիրանով ծանրոցը նա ուղարկել է Լոս Անջելեսում Թուրքիայի հյուպատոսարան և հույս հայտնել, որ այն կհասնի դերասանուհուն, որը նաև ՄԱԿ-ի՝ փախստականների հարցերով բարի կամքի դեսպանն է։ «Դերասանուհուն մաղթում եմ ապաքինում: Նաեւ ցանկանում եմ մարդկանց հիշեցնել բանջարեղենի եւ մրգերի օգտակարության մասին»,- ասել է պատգամավորը:
Ըստ պատգամավորի` ծիրանը բազմաթիվ բուժիչ հատկություններ ունի, այդ թվում՝ նվազեցնում է քաղցկեղի, ինչպես նաև լյարդի ու սրտի հիվանդությունների հավանականությունը:
Հիշեցնենք, որ դերասանուհի Անջելինա Ջոլին կրծքագեղձի կրկնակի հեռացման վիրահատություն է տարել: Այս մասին դերասանուհին բարձրաձայնելով ցանկացել է, որ աշխարհում նման խնդիրներ ունեցող կանայք համարձակ կերպով վաղ վիրահատություններին համաձայնեն՝ հնարավոր քաղցկեղը կանխելու համար։
