Արցախում Հայաստանի Հանրապետության ներկա իշխանությունների մի քանի ներկայացուցիչների այսօրվա ներկայությունը և վարչապետի շնորհավորանքը ընդամենը արարողակարգային քայլեր են, որոնք թերևս չէին կարող չլինել: Եթե չշնորհավորեին ու չգնային` այս պահին կարող էր և ճիշտ չդիտարկվել: Եվ դա հասկանալի է:
Ժառանգել ենք մի իրավիճակ, որին համարժեք գոնե արտաքին ձևավորմամբ ՀՀ ներկա իշխանությունները ստիպված են արձագանքել: Եվ պետք չէ դիտարկել դա որպես ի սրտե ուրախության դրսևորում, որ Արցախն իբր անկախ է Հայաստանից:
Արարողակարգ է, անում են:
Իսկ ընդհանուր առմամբ` Արցախի այսպես կոչված անկախության տոնը գոնե մոտ ապագայում պետք է հանել: Ժամանակի ընթացքում էլ` ուղղակի պաշտոնական միացում ապահովել:
Որքան շուտ` այնքան լավ:
Ամենակարևորը սակայն գիտակցումն է, որ նախորդ երեք նախագահների օրոք ազգադավ քաղաքականությամբ անկախության կեղծ թեզն առաջ է մղվել:
Հիմա էլ Արցախում մեր հայրենիքի այդ մասի Հայաստանից անկախության սրտանց տոնողները թերևս միայն իրենք են մնացել և Արցախի իշխանությունները, որոնց համար ամեն վերահսկողությունից անկախ զգալն այլևս անվերահսկելի սովորույթ է դարձել:
