Ամերիկացի Դուեյն Յուդը, ով Փեյսոն քաղաքից է, իր Cessna ինքնաթիռով մտել է սեփական տուն, որտեղ քնած էին նրա երեխան և կինը: Այս ամենը տղամարդն արել է, որպեսզի կնոջից վրեժխնդիր լինի:
Տղամարդը պատահարից մի քանի ժամ առաջ հարբել էր և վիճել կնոջ հետ: Հարևանները ոստիկանություն էին կանչել: Ամուսիններին ձերբակալել էին: Բաժնում կինը ցուցմունք էր տվել ամուսնու դեմ և վերադարձել տուն: Մի քանի ժամ հետո տղամարդուն նույնպես ազատ են արձակել: Ոստիկանների ուղեկցությամբ տղամարդը տնից հավաքել է բոլոր իրերը և դուրս եկել:
Ինչպես ավելի ուշ պարզվել է, նա գնացել է օդանավակայան, որտեղից էլ օդ էր հանել ինքնաթիռը:
Ոստիկանների խոսքերով՝ հրաշք է կատարվել, քանի որ հանցագործը, բացի իր տնից, ոչ մի տան վնաս չի հասցրել: Չափազանց մեծ արագությունից նա տեղում մահացել է: Տարածքում հրդեհ է բռնկվել: Բարեբախտաբար, ո՛չ կինը, ո՛չ երեխան չեն վնասվել:
Տղամարդուն արդեն մի քանի անգամ ձերբակալել էին ընտանեկան բռնության համար:
