«Եթե ինձ պաշտոնապես գրանցեն, հավասար քարոզարշավ իրականացնելու հնարավարություն ընձեռեն, վստահ եմ, որ կհաղթեմ առնվազն 60 տոկոս ձայն ստանալով: Իսկ եթե մերժեն գրանցման հայտը, Ադրբեջանը ևս մեկ անգամ կհաստատի իր ֆաշիստական բնույթը»,- հայտարարել է իրեն Ադրբեջանի նախագահի թեկնածու համարող «Ադրբեջանահայերի ասամբլեայի» ղեկավար Գրիգորի Այվազյանը... Այն, որ այս մարդը, իր սահմանադրական իրավունքն առաջ մղելով, առաջադրվում է Ադրբեջանի նախագահի թեկնածու, շատ լավ է, սա ապտակ է հարևան հանրապետությանը` արդեն 20 տարուց ավելի Միլի Մեջլիսում ԼՂ պատգամավորներ ունենալու քայլին: Սակայն այս մարդը մեկ անգամ ևս հաստատում է, որ ինքն ընդամենը սովորական քաղաքական շառլատան է, ում այս հայտարարությունը պետք է փող հավաքելու համար: Ահավասիկ. «Գ. Այվազյանն ասաց, որ իրենք ֆինանսական խնդիրներ չեն ունենա, քանի որ շատ ադրբեջանահայեր, նաև Ի. Ալիևի կլանի կողմից ստորադաս ու ճնշված վիճակում գտնվող կլանները պատրաստակամ են ֆինանսական միջոցներ տրամադրել»... Ինչու՞ է Գրիգորի Այվազյանն այս հայտարարությունը Հայաստանում անում և ոչ թե Եվրախորհրդում, ինչու՞ չի հայտարարում, որ չգրանցելու դեպքում կդիմի Մարդու իրավունքների եվրոպական դատարան... Դե, նրան այդ ամենը պետք չէ... Կարևորը էժանագին էֆեկտի ձևավորումն ու փողերի կուտակումն է: Մինչդեռ խելամիտ կամ էլ ազնիվ գտնվելու դեպքում, Գր. Այվազյանը կարող էր միջազգային սկանդալ ձևավորել, մեկ անգամ ևս աշխարհին ցույց տալ ադրբեջանական պետության ճշմարիտ էությունը...
