Զանազան կասկածելի անձանց կողմից լրատվամիջոցների, տեսակետ արտահայտող անձանց «սև ցուցակ» կազմելը ամենից առաջ խոսում է կազմիչների կողմից այլ տեղեկությունների, այլ կարծիքի նկատմամբ անհանդուրժողականության, դրա հանդեպ գրեթե ենթագիտակցական վախի, մեծ ընդգրկմամբ՝ հանրությանը միակողմանի տեղեկատվական հոսքի մեջ պահելու շատ վատ նպատակ ունենալու մասին:
Նիկոլ Փաշինյանը` որպես լրագրության ասպարեզից քաղաքականություն մտած անձնավորություն, իհարկե, հրապարակավ այսօր հայտարարեց, որ դա ընդունելի չէ (բառացի այլ կերպ ասաց, բայց առանցքային իմաստը դա էր): Դե, եթե ընդունելի չէ հրապարակավ, ապա վատ չէր լինի ճշտել՝ արդյո՞ք այդ «ցուցակակազմությամբ» իր շուրջը հայտնված որոշակի անձիք չեն զբաղված: Եվ եթե նման անձինք են (ինչի կասկածները նկատեցի այս հոռի երևույթին վերաբերող այլ արձագանքներում), ապա, ինչպես իր հավաստիացմամբ, մյուս քայլերն է բացեիբաց անում, տեղին կլիներ հրապարակավ դիտողություն անել նման անձանց՝ մյուսներին էլ հասկացնելով, որ սխալ ուղղությամբ են գնում կամ գնում են իր իսկ հռչակած «ավելի լավ Հայաստանի» առանցքային մոտեցումը ժխտելու ուղղությամբ: Չգիտեմ՝ կանե՞ն, թե՞ չեն անի: Իրենց որոշելիքն է, իհարկե: Բայց հետևություններ անելն էլ ամեն մեկի ինքնուրույն որոշելիքն է:
«Սև ցուցակ», «ուղղորդված ապատեղակատվություն», «հետևողական ապակողմնորոշում» և այլն. դրանք հայտնի մանիպուլյատիվ հնարքներ են, որոնք այս օրերին առավել քան ակտիվորեն կիրառվում են, ուստի իմ բոլոր ընկերներին, որոնք սիրում են ԻՆՔՆՈՒՐՈՒՅՆ ՄՏԱԾԵԼ (վստահ եմ՝ իմ բոլոր ընկերներն են այդպիսին), պարզապես ընկերաբար խնդրում եմ ուշադիր լինել տեղեկատվության աղբյուրների, առհասարակ, հրամցվող տեղեկատվության նկատմամբ առնվազն, զերծ մնալ այլոց անձնապես վիրավորելուց, ինչպես նաև արտահայտած տեսակետի համար այպանել-վիրավորելուց: Վերջիվերջո, Ֆեյսբուքն (օրինակի համար) կարծես յուրաքանչյուրին թույլ է տալիս իր պատին արտահայտել իր մոտեցումները, տեսակետները, ընկալումները և այլն:
Հ.Գ. Երեկ հարցումանման մի բան էի կազմակերպել և պարզեցի, որ ոչ մի ընկերոջ ու ֆրենդի երբևէ չեմ ասել, հրամայական կամ անընդունելի որևէ այլ ձևով չեմ ասել, թե ինքն ինչ ասի կամ ինչի մասին լռի, ինչպես մտածի և այլն: Շնորհակալություն արձագանքած ընկերներին:
Միաժամանակ զգուշացնում եմ, որ իմ գրառումների ներքո «քֆուր-քաֆար» անողները, «էս գրելու տեղն է»-ի կարգի, էլ չեմ խոսում ագրեսիվ կամ վերբալ ագրեսիայի ոգով «մեկնաբանոթյուն» թողնողները, առանց բացատրությունների ու բացառության «բլոք» են արվելու:
Հա, ի դեպ, «բլոկ» եմ անելու (այս դեպքում՝ ժամանակավոր) նաև այն ֆրենդներին, ովքեր չատով «անհապաղ տարածեք»-ներ են ուղարկում:
Ողջություն, ողջախոհություն և սթափություն եմ մաղթում բոլորին:
