Հայաստանում իշխանությունը ձևավորվել է ընտրությունների հիման վրա։ Մարդկանց կարծիքները կարող են լինել սուբյեկտիվ, դրա համար էլ կան հատուկ մասնագիտացված, այդ թվում և միջազգային կառույցներ, որոնք գնահատում են ընտրությունների որակը։ Եվ այդ գնահատականներով՝ ընտրություններն արտահայտել են հայ ժողովրդի կամքը։ Այս պնդումը Սերժ Սարգսյանն արել է «Շանթ» հեռուստաընկերությանը տված բացառիկ հարցազրույցում։
«Ես չեմ ասում, որ եղել են իդեալական ընտրություններ, և չեմ բացառում, որ խախտումներ են եղել տարբեր տիպի, տարբեր տեսակի։ Բայց այդքան համատարա՞ծ, ու այդ մարդիկ չե՞ն տեսել դա։ Հարյուրավոր դիտորդներ են եղել, չե՞ն տեսել։ Հիմա խոսում են համատարած ընտրակաշառքների մասին։ Բա այդ ինչպե՞ս եղավ, որ 2017 թվականին, երբ ամեն ինչը նկարում է՝ հեռախոսից սկսած, ամեն ինչ ուղիղ եթերում է, հանկարծ մի տեղ չտեսան այդ համատարած ընտրակաշառքներ բաժանելը»։
Վարչապետի խոսքով՝ կան մի խումբ մարդիկ, որ ընտրություններից հետո փորձում են այլ ուղիներով փոխել ընտրությունների արդյունքները։ Սերժ Սարգսյանը սա երկրի զարգացման տեսակետից անընդունելի է համարում։
«Բոլոր միջազգային կառույցները միաբերան ասում են, որ այս տարիների ընթացքում Հայաստանի ձեռքբերումներից մեկը քաղաքացիական հասարակության կայացումն է։ Բա այդպիսի քաղաքացիական հասարակություն, ու չկարաղացա՞ն մարդկանց կաշառք բաժանելը ֆիքսել»,– նշել է Սարգսյանը։
«Հայաստանում ընդհանրապես տեղի ունեցած ընտրություններից հետո մեղադրում էին ընտրությունների կազմակերպիչներին, որ լցոնումներ են եղել, որ եղել է կրկնակի քվեարկություն, որ նույնիսկ գերեզմաններից են մարդիկ եկել քվեարկել, նորից գնացել, պառկել և այլն»,– ասել է Սարգսյանը։
Վարչապետի խոսքերով՝ իր խնդրանքով Եվրամիությունը, Միացյալ Նահանգները և այլ գործընկերներ Հայաստանին ցուցաբերեցին տեխնիկական օժանդակություն, և հնարավոր եղավ տեխնիկապես այնպես սարքավորել, որ որևէ մեկի մոտ կասկած չառաջացավ ընտրությունների վերաբերյալ։ Բայց այդ դեպքում էլ ընտրողների թիվն ավելի շատ էր, քան նախորդ ընտրությունների ժամանակ։
«Այսինքն՝ նախորդ ընտրություններին այդ մեղադրանքները ուղղակի հերյուրանքներ էին, չէ՞»,– նշել է Սերժ Սարգսյանը։
