Իրանի իսլամական հեղափոխության պահապանների կորպուսի (ԻՀՊԿ) ազդեցության տակ գործող հեղինակավոր կայքերից մեկը հանդես է եկել մի հրապարակմամբ, որտեղ ոչ միանշանակ են ընդունվում և ներկայացվում Թուրքիա-Իրան հարաբերությունների ներկա մակարդակը և դեպի ջերմացում գնալը։

Մասնավորապես նշվել է, որ Թուրքիան այժմ մեծ ներկայություն ունի մի շարք ռազմավարական նշանակություն ունեցող ջրային տարածքներում, ինչպիսիք են Սև, Միջերկրական, Մարմարա և Էգեյան ծովերը, և ցանկություն ունի իր ազդեցությունը տարածել նաև տարածաշրջանային կարևորություն ունեցող ծովերից նաև Պարսից ծոցում ու Կարմիր ծովում։ 
Կարմիր ծովում Թուրքիան փորձում է ակտիվանալ Սուդանում գտնվող Սավակին (Սուակին) ռազմաբազայի շնորհիվ, որը վերջերս է 99 տարով վարձակալել։
Պարսից ծոցում Թուրքիան իր ներկայությունն ապահովում է Կատարի ռազմաբազայի շնորհիվ։

Իրանում կարծում են, որ Թուրքիայի հետ հարաբերությունների զարգացմանն ուղղված քայլերի հետ մեկտեղ չպետք է թուլացնել զգոնությունը, քանի որ հատկապես Պարսից ծոցում Թուրքիայի ակտիվությունը հիմնականում ուղղված է Իրանի դեմ, և Թուրքիան իր քայլերն անում է՝ հաշվի առնելով Իրանի հետ մրցակցությունը։

Հատկանշական է, որ հոդվածը հրապարակվում է այն ժամանակ, երբ ԻԻՀ նախագահ Հ․ Ռուհանին պատրաստվում է մեկնել Թուրքիա՝ մասնակցելու Սիրիայի հարցով եռակողմ՝ ԻԻՀ-ՌԴ-ԹՀ բանակցություններին։

Բացի այդ՝ սա նաև պահպանողական ճամբարից մեսիջ կարող է լինել Հ․ Ռուհանիին և վերջինիս վարած արտաքին քաղաքականությանը, մանավանդ եթե հիշենք, որ վերջերս Իրանի հեղինակավոր պարբերականներից մեկը դժգոհություն էր հայտնել նաև Իրանի՝ Ադրբեջանի հանդեպ վարած քաղաքականության նկատմամբ։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել