Araratnews.am-ը գրում է.

Հռոմի Պապ Ֆրանցիսկոսը ներողություն է խնդրել իր մեկնաբանությունների համար՝ կապված չիլիացի եպիսկոպոսի հետ, ում մեղադրում են սեռական ոտնձգության քողարկման մեջ: Այդուհանդերձ Ֆրանցիսկոս պապը չի հրաժարվել եպիսկոպոսին աջակցելուց. հաղորդում է Ամերիկայի Ձայնը:

Նա այս առիթով տվել է մեկնաբանություններ Չիլի և Պերու այցելությունից առաջ: Հռոմի պապը լրագրողներին ասել է, որ ցավում է այն խոսքերի ու երանգների համար, որոնք օգտագործել է մեկնաբանություն անելիս, երբ անցած շաբաթ պատասխանել է լրագրողի հարցին եպիսկոպոս Խուան Բարոսի առնչությամբ:

«Բարոսի գործով ընթացել է հետաքննություն, սակայն որևէ ապացույց ի հայտ չի եկել: Այս առումով ես նկատի ունեի, որ չեմ կարող դատապարտել նրան, քանի որ չունեմ ապացույց»,- ասել է Հռոմի պապը:

Նա կրկին իր աջակցությունն է հայտնել եպիսկոպոս Բարոսին՝ ընդգծելով, որ Վատիկանն անցկացրել է հետաքննություն, սակայն չի հայտնաբերել եպիսկոպոսին դատապարտելու որևէ առիթ:

Եպիսկոպոսի քննադատները նրան մեղադրում են իր նախկին ղեկավար չիլիացի քահանա Ֆերնանդո Քարադիմայի սեռական ոտնձգության մասին լռելու հարցում:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել