Երբ մի քանի օր առաջ գրեցի, որ Րաֆֆի Հովհաննիսյանը կատարում է իշխանությունների հրահանգը և նոր ձևավորվող «Նոր Հայաստան» շարժման միջոցով սատարում նույն իշխանություններին, որոշ օգտատերեր ինձանից խիստ նեղացել էին, իմ գրառումը համարել ոչ ճշմարիտ: Մինչդեռ բացահայտվող փաստերն ապացուցում են իմ դիտարկումների ճշմարտացիությունը: Իմ ունեցած հստակ ու աներկբա տեղեկություններով, «Նոր Հայաստան» շարժման ֆինանսավորողն ու աջակցողը Արա Աբրահամյանն է` Ռուսաստանի հայերի միության նախագահը, ով ունի հանձնարարություն` նպաստել իշխանական նոր շարժման ձևավորմանն ու 2018-ի նախագահի ընտրություններն իշխանական սցենարով զարգացմանը: Ես նաև գրել էի, որ Րաֆֆի Հովհաննիսյանը Մոսկվա էր մեկնել Արա Աբրահամյանից հանձնարարականներ ստանալու այն բանից հետո, երբ Երևանում նրան հանդիպել էին ՌՀՄ մի քանի ներկայացուցիչներ: Օրավուր իմ դիտարկումները հիմնավորվում և հստակեցվում են: Ասվածի վկայություններից մեկն էլ slaq.am-ի հրապարակումն է` Րաֆֆի Հովհաննիսյանի մոսկովյան «գործուղման» մասին.
«Որքան էլ Արա Աբրահամյանը ժխտում է, թե ինքը չէ Րաֆֆի Հովհաննիսյանի մոսկովյան այցի մենեջերը, այնուհանդերձ, վերջինիս մոտ կանգնած «Հրապարակի» աղբյուրը պնդում է, որ նա է հրավիրել Րաֆֆուն` միտինգի հաջորդ օրը լինել իր հյուրը Մոսկվայում: Րաֆֆի Հովհաննիսյանին և նրա ընտանիքի անդամներին դիմավորել է Համլետ Ղուշչյանը, ուղեկցել Աբրահամյանի` Բառվիխայում գտնվող տուն: Թերթի հիշեցմամբ` այդ «դաչաներում» է ապրում ռուսական ողջ «տուսովկան», այդ թվում և Պուտինը: Հովհաննիսյանները գիշերել են Աբրահամյանենց տանը, վերջինս շատ բարձր ընդունելություն է կազմակերպել նրանց պատվին, զրուցել են, կիսվել: Արա Աբրահամյանն իր մտերիմների շրջապատում ասել է, որ Րաֆֆին շատ խելացի մարդ ու քաղաքական գործիչ է: Որևէ էական հանդիպում Հովհաննիսյանները չեն ունեցել, հաջորդ օրը Մոսկվայում շրջել են ու հետկեսօրին վերադարձել Երևան: Ի դեպ, թերթի աղբյուրները տեղեկացնում են նաև, որ Արա Աբրահամյանը միայնակ է ընդունել նրանց, նրա ընտանիքը, կինն ապրում են Լոս Անջելեսում»:
Հիմա դիմում եմ բոլոր նրանց, ովքեր «Նոր Հայաստանի» մեջ տեսնում են լուսավոր կետ. սա հերթական սադրանքն է, ժողովրդին նվաստացնելու և նրա ճշմարիտ ձգտումները դեպի փակուղի տանելու ծրագիրն է, որն իրականացվում է Րաֆֆի Հովհաննիսյանի ձեռքերով: Պետք է հեռանալ այս շարժումից և ձևավորել ճշմարիտ ու ամբողջական հայեցակարգերի վրա հենվող քաղաքացիական նախաձեռնություն, եթե գնահատում ենք իրավիճակներն ու մարտահրավերները, եթե կամենում ենք ունենալ իսկապես ՆՈՐ ՀԱՅԱՍՏԱՆ...
