Այսօր առավոտյան Ուկրաինայի անվտանգության ծառայության աշխատակիցները պետական հեղաշրջման փորձ անելու մեղադրանքով ձերբակալեցին ընդդիմադիր, Վրաստանի նախկին նախագահ Սահակաշվիլիին նրա Կիեւի ապաստարանում: Սակայն Սահակաշվիլիի հետեւորդները, որոնք երեկ հսկայական բողոքի ցույց էին կազմակերպել, հետ մղեցին ուժային կառույցների գրոհը եւ ազատագրեցին իրենց առաջնորդին: Վերջին տվյալներով, որոնք անընդհատ փոփոխվում են, Միխեիլ Սահակաշվիլին բարձրացել է տան տանիքի վրա, մինչդեռ նրա աջակիցները խոչընդոտում են ոստիկանության փորձերը հանել նրան այնտեղից: Սահակաշվիլին մեղադրում է Պորոշենկոյի կառավարությանը կաշառակերության եւ Պուտինի հետ համագործակցության մեջ: Սահակաշվիլիին Ուկրաինա ժամանակին հրավիրել էր հենց նախագահ Պորոշենկոն՝ նշանակելով նրան Օդեսայի նահանգապետ, սակայն հետո զրկել էր նրան քաղաքացիությունից: Վերջերս Սահակաշվիլին իր համախոհներով ճեղքեց սահմանապահների պատնեշը եւ մտավ Ուկրաինա Լեհաստանի կողմից, որից հետո սկսեց ընդդիմադիր գործունեությունը Կիեւում:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել