Ստորև ներկայացնում ենք Րաֆֆի Հովհաննիսյանի շտաբի հայտարարությունը իշխանությունների կողմից ընտրակեղծարարներին հովանավորելու փաստերի կապակցությամբ.
«Ինչպես եւ սպասելի էր, Սերժ Սարգսյանի խոստումները, թե իշխանությունները հետամուտ են լինելու փետրվարի 18-ին տեղ գտած ընտրախախտումների բացահայտմանն ու կեղծարարներին պատժելուն՝ հերթական շոուի մաս են կազմում:
Ապրիլի 2-ին ՀՀ հատուկ քննչական ծառայությունում զննվեց Արարատի մարզի թիվ 17/05 ընտրական տեղամասի փաստաթղթերի պարկը: Հատուկ քննչական ծառայությունը «պարզեց», որ գերազանցապես ՀՀԿ ներկայացուցիչներից կազմված հանձնաժողովը կեղծիքներ է թույլ տվել… Րաֆֆի Հովհաննիսյանի օգտին:
Հիշեցնենք, որ սա այն հանձնաժողովն է, ուր կեղծարարները, ներխուժելով տեղամաս, բռնել էին դիտորդ Նարինե Իսմայիլի ձեռքերը, որպեսզի նա չտեսանկարահանի, եւ հարյուրավոր քվեաթերթիկներ լցոնել քվեատուփի մեջ: Նման դեպքում իրավապահ մարմինը պետք է նախեւառաջ գրաֆոլոգիական փորձաքննություն նշանակեր ընտրամատյաններում դրված ստորագրությունների համար՝ պարզելու, թե ովքեր են ստորագրել լցոնված քվեաթերթիկների թվին համապատասխան Հայաստանից բացակայող քաղաքացիների ազգանունների դիմաց: Դրա համար պետք է պարզեր, թե քվեարկությանը մասնակցած քաղաքացիներից ովքեր են իրականում բացակայել երկրից եւ ինչպես է նրանց ազգանունների կողքին ստորագրություն հայտնվել: Սակայն հասկանալի է, որ անարդարադատության նվիրյալները կաշառքով բարձրագույն իրավաբանական կրթության դիպլոմներ են գնել ոչ թե ճշմարտությունը բացահայտելու, այլ վերադասների պատվերները կուրորեն կատարելու համար:
Օրերս նաեւ կարճվեց Վանաձորի թիվ 29/13 ընտրատեղամասում սույն հայտարարությանը կից ներկայացված լուսանկարի փաստով զինվորական դատախազությունում բացված քրեական գործը՝ «հանցակազմի բացակայության» հիմնավորմամբ: Կարելի է կարծել՝ դիտողի աչքին է երեւում, որ սպան կանգնած է քվեարկող զինվորից անթույլատրելիորեն մոտ հեռավորության վրա, ինչը քվեարկության գաղտնիության լուրջ խախտում է:
«Բավարար ապացույցների բացակայության» հիմնավորմամբ կարճվել է նաեւ մեկ այլ գործ, որը վերաբերում է Երեւանի Մալաթիա-Սեբաստիա թաղամասում գտնվող թիվ 8/23 ընտրատեղամասի հանձնաժողովի անդամ Սյուզի Ալեքսանյանի այն վկայությանը, թե իր աչքի առջեւ իրականացվել է լցոնում, ապա եւ փորձ է արվել ցուցմունք չտալու դիմաց կաշառել իրեն:
Այսպիսով՝ գործող դե ֆակտո նախագահ Սերժ Սարգսյանը հստակ ցույց է տալիս հասարակությանը, որ մտադիր է հովանավորել եւ իր անձնական պաշտպանության տակ առնել անգամ ամենավերջին ընտրակեղծարարին:
Մենք խստորեն դատապարտում ենք իրավապահ մարմինների կողմից ընտրական իրավախախտումները կոծկելու եւ հանցագործներին պարտակելու քրեորեն պատժելի գործելաոճը: Սրանով Սերժ Սարգսյանը՝ որպես ՀՀ սահմանադրության երաշխավոր, փաստորեն հերթական ինքնաբացարկն է տալիս իր անմիջական պարտականությունների եւ գործառույթների իրականացումից:
Րաֆֆի Հովհաննիսյանի շտաբ
3 ապրիլի 2013թ.»
