ՏՏ ներկայացուցիչներ հայկական դեսպանատներում
Եթե ուսումնասիրենք Հայաստանում տեղեկատվական տեխնոլոգիաների ոլորտում վերջին տարիներին արձանագրվող աճը, ապա կփաստենք, որ պետության կողմից վերը նշված ոլորտի զարգացման նոր ռազմավարության առաջադրումը սպասելի էր:
Դինամիկ զարգացող ոլորտի վերաբերյալ կառավարությունը հստակեցնում է իր ծրագրերը: Այդ նպատակով ՏՏ ոլորտի ներկայացուցիչների հետ հանդիպած վարչապետը նշել էր, որ սպասում է մասնագետներից հստակ ծրագրեր՝ ոլորտը փոխելու համար:
Նման ոլորտների զարգացումը ապահովելու համար ոչ պակաս կարևոր է մասնավորի և պետության համագործակցությունը: Այստեղ նույնպես առկա են գործնական քայլեր. խոսքը գնում է մասնավոր ընկերությունների հետ ամենշաբաթյա ռեժիմով հանդիպումների ու քննարկումների մասին:
Դրանից զատ՝ պետությունը մասնագետներին հստակ հասկացրել է, որ չի սահմանափակվելու ներքին շուկայով: Դրա վառ ապացույցն է այն, որ գործադիրի որոշմամբ կարճ ժամանակահատվածում 15 երկրներում գործող հայկական դեսպանատներում կլինեն ՏՏ ներկայացուցիչներ, ովքեր լիազորված կլինեն հանդես գալ պետության կողմից:
Սա կարող է լուրջ խթան հանդիսանալ արտաքին շուկաների հետ համագործակցության նոր ծրագրերի իրականացման համար։
