Տեղի է ունեցել Հայաստանի ֆուտբոլի ֆեդերացիայի նախագահ Ռուբեն Հայրապետյանի մամլո ասուլիսը, որտեղ վերջինս ներկայացրել է Հայաստանի ազգային հավաքականի նոր գլխավոր մարզչին։ Մեր թիմի նոր գլխավոր մարզիչը լինելու է հավաքականի նախկին ֆուտբոլիստ Արթուր Պետրոսյանը, ով մարզում էր շվեյցարական Ցյուրիխի երիտասարդական թիմը։ Արթուրին ներկայացնելու կարիք չկա, քանի որ նրան հայ ֆուտբոլասերները լավ են ճանաչում։ Հարգված ու սիրված ֆուտբոլիստ է եղել, ու նրան պետք է հաջողություն մաղթել ազգային հավաքականում։ Ինչ մնում է կազմի ընտրությանը, ապա այն որոշակի փոփոխության ենթարկվել է, մասնավորապես նորից հավաքական է հրավիրվել Արթուր Սարկիսովը, Գևորգ Ղազարյանը ու մի քանի նորեկներ։ Վնասվածք է ստացել Արազ Օզբիլիսը, ով հանդես է գալիս թուրքական «Բեշիկթաշում», ինչպես նաև նորից բացակայելու է Յուրա Մովսիսյանը։ Վերջինիս հարցը բավականին մեծ աղմուկ է բարձրացրել հանրության շրջանում, և թեպետ Հայրապետյանը բազմիցս անդրադարձել է դրան, ամեն դեպքում լրագրողները նորից բարձրացրին Մովսիսյանի թեման։ Ռուբեն Հայրապետյանը նշեց, որ Յուրան խախտել է կանոնակարգն, ու քիչ էր մնում՝ մարզումներին մեքենայով դաշտ մտնի։Դե ինչ, ենթադրենք՝ Հայրապետյանը ճիշտ է։ Սակայն նա երբեմն մոռանում է, որ ֆուտբոլիստները նույնպես մարդ են, սխալվելու իրավունք ունեն, և եթե Մովսիսյանն իսկապես այդպես է պահել իրեն, ապա արժեր նախ այդ հարցը քննարկել, դարձնել հանրային քննարկման առարկա, նկատողություն տրվեր ֆուտբոլիստին, ով իր հերթին կսթափվեր ու կփորձեր ուղղել սխալը։ Նշենք, որ, առհասարակ, դեպքերի վերաբերյալ հանրությանը հայտնի է միայն ֆեդերացիայի և անձամբ Հայրապետյանի կարծիքը, քանի որ Յուրա Մովսիսյանը այս մասին համառորեն չի ուզում խոսել։ Ի վերջո, մենք չունենք ֆուտբոլիստների այնպիսի մեծ ցանկ, որը հնարավորություն կտար ընտրություն կատարելու լավի կամ ավելի լավի միջև։ Պետք է լինենք անկեղծ և խոստովանենք, որ Յուրա Մովսիսյանի պես հարձակվող մենք այսօր չունենք։ Առջևի գծում ո՛չ Գեղամ Կադիմյանը, ո՛չ էլ Դավիթ Արշակյանը ի զորու չեն լրացնելու այդ բացը, իսկ եթե հաշվի առնենք, որ հավաքականից այս անգամ բացակայելու է նաև Արազ Օզբիլիսը, ով վնասվածք է ստացել մարզման ժամանակ, ապա կարող ենք միանշանակ ասել, որ Յուրայի պակասը անխոս զգացվելու է։
Ինչ մնում է հավաքականի առաջատար Հենրիխ Մխիթարյանին, ապա նրա ապագան Մանչեսթերում շարունակում է մնալ անորոշ։ Մխիթարյանը չի ընդգրկվում Ժոզե Մոուրինյոյի հրապարակած հայտացուցակում ու, ցավոք, խաղային պրակտիկայի մեծ պակաս ունի։ Ամեն դեպքում Հենրիխը հրավիրվել է հավաքական և կմասնակցի Չեռնոգորիայի դեմ նոյեմբերի 11-ին կայանալիք խաղին։ Հուսանք՝ այսօր տաղանդավոր ֆուտբոլիստը կմասնակցի իր թիմի խաղին։ Հիշեցնենք, որ Յունայթեդն այսօր Եվրոպայի լիգայի շրջանակներում Ստամբուլում մրցում է Ֆեներբախչեի դեմ։ Դե իսկ Արթուր Պետրոսյանին ևս մեկ անգամ մաղթում ենք արդյունավետ ու բեղուն աշխատանք։ Հուսանք, որ մեր հավաքականի լեգենդար ֆուտբոլիստը նույնքան հաջողակ կլինի նաև մարզչական գործում։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել