«168 ժամ»-ի տվյալներով՝ կարծես թե ուրվագծվել է ՀՀԿ-ԲՀԿ առճակատումը լուծելու փոխզիջումային տարբերակը, որը կայանում է նրանում, որ Ծառուկյանն էլ նկրտումներ չի ունենա վարչապետի պաշտոնի համար, բայց փոխարենը կստանա Երևանի քաղաքապետի պաշտոնը։ Ըստ թերթի՝ այս տարբերակն այժմ ակտիվ քննարկվում է ԲՀԿ-ում ու դիտարկվում է որպես բավականին օպտիմալ լուծում։
Անձամբ ես բավականին մեծ սկեպսիսով եմ վերաբերվում այս լուրին, թեև չեմ կարող ասել, որ այն անհավանականների տարբերակից է։ Ի վերջո, պետք է հասկանալ, որ Ծառուկյանը ամբիցիոզ գործիչ է, իսկ վարչապետի ու քաղաքապետի պաշտոնների միջև բավականին մեծ դիստանցիա կա։ Բացի դրանից, ես վստահ չեմ, որ Ծառուկյանը կուզենա այսքան շուտ վերսկսել բացեիբաց համագործակցությունը ՀՀԿ-ի հետ, որովհետև բազմիցս է խոսվել, որ նրան ամենաշատը վախեցնում է արթուրբաղդասարյանանալու հավանականությունը։
Մյուս կողմից էլ, Երևանի քաղաքապետի պաշտոնը իրոք լուրջ պաշտոն է, որը կարող է շատ լուրջ դերակատարություն ունենալ ԲՀԿ-ի համար՝ 2017 թվականի պառլամենտական ընտրություններին, առավել ևս, եթե հաշվի առնենք, որ ԲՀԿ-ն րադիցիոն թույլ է եղել Երևանում, ինչը չի կարելի ասել մարզերի մասին։ Ըստ այդմ՝ չի կարելի բացառել, որ Ծառուկյանն այնուամենայնիվ չի խորշի նման առաջարկից՝ պայմանով, որ այդպիսին կլինի։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել