Ինչպես հայտնի է, առաջին եռամսյակում Հայաստանում արձանագրվեց 4,4 տոկոս տնտեսական աճ։ Թեև առաջին վեց ամիսների տնտեսական աճը դեռևս չի հրապարկվել, բայց տնտեսական ակտիվությունը շարունակում է բարձր լինել։ Առաջին կիսամյակի տվյալներով, այն կազմեց 4,8 տոկոս, ինչը մեկ տոկոսով գերազանցում է նախորդ տարվա նույն ժամանակահատվածի ցուցանիշը։ Թերևս տնտեսական ակտիվության նման ցուցանիշներն են հիմք հանդիսացել միջազգային վարկանշային «Ֆիթչ» ընկերության համար, որի կանխատեսումներով, այս տարի Հայաստանում տնտեսական աճը կկազմի 3,5 տոկոս։ Հաջորդ երկու տարիների համար ակնկալվում է միջինը 3,6 տոկոսանոց աճ։
Հիշեցնենք, որ նախկինում այս կազմակերպությունը բավակնաին համեստ կանխատեսումներ էր անում ընթացիկ տարվա տնտեսական աճի վերաբերյալ։ Այն ընդամենը 2 տոկոսի սահմաններում էր։ Սա նշանակում է, որ վերջինս այժմ շատ ավելի դրական սպասելիքներ ունի Հայաստանի տնտեսության վերաբերյալ։ Նման կախատեսման հիմքերից մեկն այն է, որ վարկանշային ընկերության փորձագետները սկսել են ավելի քիչ կապ տեսնել արտաքին հատվածից Հայաստանի տնտեսության վրա ազդեցությունների առումով։ Նրանք կարծում են, որ ՀՀ տնտեսությունը կշարունակի աճել, անկախ նրանից, որ ՌԴ և ԱՊՀ այլ երկրներից ռիսկերը վերջին երկու տարիներին բավականաչափ ավելացել են։ Փաստացի «Ֆիթչ» վարկանշային ընկերության այս տարվա տնտեսական աճի գնահատականը գրեթե համընկնում է կառավարության «Միջինժամկետ ծախսերի» ծրագրով ներկայացված ակնկալիքներին։ Այդ փաստաթղթով գործադիրը կանխատեսում է 3,7 տոկոս տնտեսական աճ։
Իհարեկ տնտեսական զարգացումների վերաբերյալ թե՛ կառավարության, թե՛ «Ֆիթչ»-ի սպասումները էապես գերազանցում են պետական բյուջեով նախատեսված ցուցանիշը։ Չմոռանանք, որ այս տարվա գլխավոր ֆինանսական փաստաթղթով տնտեսական աճի սպասելիքներն ընդամենը 2,2 տոկոսի սահմաններում են։
