168.am-ը գրում է.
Վրաստանի վարչապետ Գեորգի Կվիրիկաշվիլին Թուրքիա կատարած այցի շրջանակում հանդիպել է երկրի նախագահ Ռեջեփ Էրդողանի և Թուրքիայի վարչապետ Բինալի Յըլդըրըմի հետ, նրանց հետ քննարկել համագործակցության հարցեր, հայտնում է Sputnik գործակալությունը:
Վրաստանի վարչապետը Թուրքիա էր ուղևորվել երկրում ռազմական հեղաշրջման փորձից 4 օր անց: Այցի շրջանակում Անկարայում կայացել է երկու երկրների ռազմավարական համագործակցության խորհրդի նիստը:
Կվիրիկաշվիլին և Էրդողանը քննարկել են ռազմավարական համագործակցության և Վրաստանի ու Թուրքիայի միջև նոր համաձայնագրերի միաժամանակյա կյանքի կոչման հարցեր:
Վրաստանի վարչապետն իր աջակցությունն է հայտնել Թուրքիայի օրինական իշխանությանը և կարևորել երկու երկրների միջև ռազմավարական համագործակցությունը:
Վրացական պատվիրակության կազմում են նաև էկոնոմիկայի նախարար Դմիտրի Կումսիշվիլին, Վրաստանի ԱԳՆ ղեկավար Միխայիլ Ջանելիձեն, առողջապահության նախարար Դավիթ Սերգեյենկոն, գյուղատնտեսության նախարար Օտար Դանելիան, մշակույթի նախարար Միխայիլ Գիորգաձեն և այլ նախարարներ:
