Lurer.com–ը գրում է.
Մեծ Բրիտանիայի խորհրդարանի ստորին պալատը սեպտեմբերի 5-ին կքննարկի Եվրոպական միությունում անդամակցության վերաբերյալ կրկնակի հանրաքվե անցկացնելու հարցը: Ինչպես հաղորդում է «Արմենպրես»-ը, այս մասին նշվում է Համայնքների պալատի մամլո բաժնի տարածած հաղորդագրության մեջ:
Brexit-ի հարցով կրկնակի հանրաքվե անցկացնելու վերաբերյալ դիմումը ստորագրել է ավելի քան 4.1 միլիոն մարդ: Ստորագրահավաքի վերաբերյալ հայտարարությունը տեղադրված է բրիտանական խորհրդարանի պաշտոնական կայքում: Որևէ հարցի` խորհրդարանի օրակարգ մտնելու համար բավարար է, որ դրա օգտին հավաքվի 100 հազար ստորագրություն:
Հունիսի 23-ին տեղի ունեցած հանրաքվեին բրիտանացիների 51.9 տոկոսը քվեարկել էր ԵՄ-ից դուրս գալու օգտին: Միաժամանակ Բրիտանիայի կառավարությունը հրաժարվել էր քննարկել կրկնակի հանրաքվե անցկացնելու վերաբերյալ հարցը` հունիսի 23-ին հանրաքվեն անվանելով այս սերնդի համար «միակը»:
