Ալիևների լոնդոնյան անկլավը. Ադրբեջանի նախագահի դուստրերը տասնյակ միլիոնավոր դոլարանոց տներ ունեն Լոնդոնում

Tert.am-ը գրում է.

Կազմակերպված հանցավորության և կոռուպցիայի բացահայտման հետաքննական կենտրոնը (OCCRP) իր պաշտոնական էջում անդրադարձել է մեծ աղմուկ հանած «պանամական փաստաթղթերին», մասնավորապես՝ Ադրբեջանի նախագահ Իլհամ Ալիևի ու նրա ընտանիքի օֆշորային հարստությանը:

«Լոնդոնի կենտրոնում գտնվող Նայթսբրիջ թաղամասում կա մի շինություն` ամբողջովին հայելապատ, պատրաստված ընտիր հղկված մարմարից, իսկ ամեն հարկում դռնապաններ են կանգնած: Լոնդոնի սրտում գտնվող այս հարգի շինության պենտհաուսը պատկանում է Ալիևի դուստրերին` Լեյլային և Արզուին:

Սա ամենաթարմ բազմամիլիոնանոց անշարժ գույքն է, որի պատկանելության ու իրական տերերի վերաբերյալ գաղտնիքը բացահայտվել է վերջերս: Այն կազմում է 2003թ. նավթի պաշարներով հարուստ երկրում իշխանության գալուց ի վեր Ալիևների կուտակած ահռելի հարստության մի մասը միայն»,-նշվում է occrp.org կայքում:

OCCRP-ին հաջողվել է պարզել, որ Ալիևների ընտանիքն ամբողջ աշխարհում 140 մլն դոլարի շքեղ տներ ու բնակարաններ ունի: Եվ սա նրանց պատկանած անշարժ գույքի դեռ մի մասն է:
Պենտհաուսն Ալիևները գնել են 2006թ. սեպտեմբերին: 101 քմ մակերեսով անշարժ գույքի գնման գործարքը կնքվել է Վիրջինյան կղզիներում գրանցված Capper Marketing Inc. օֆշորային ընկերության միջոցով: Դրա իրական տերերի վերաբերյալ տեղեկությունը քողարկված է եղել:

Աղբյուրը մանրամասնում է, որ բացի այդ՝ Ալիևները 25 մլն դոլարանոց առանձնատուն ունեն Լոնդոնի մեկ այլ հատվածում, 8 մլն դոլարանոց բնակարան` Հայդ Պարկի մոտ, 44 մլն դոլար ընդհանուր արժեքով 9 առանձնատուն` Դուբայում,  37 մլն դոլար արժողությամբ առանձնատուն` Մոսկվայից ոչ հեռու, 1.1 մլն դոլարանոց առանձնատուն` Չեխիայի հանգստավայրերից մեկում:

Հիշեցնենք, որ վերջերս հեղինակավոր The Guardian պարբերականը գրել էր, որ Ադրբեջանի նախագահ Իլհամ Ալիևի դուստրերը` Արզու և Լեյլա Ալիևաները, օֆշորային ընկերություն ունեն Բրիտանական Վիրջինյան կղզիներում` մանրամասնելով, որ այն հիմնելու հարցում Ալիևների ընտանիքին օգնել է լոնդոնյան Child & Child իրավաբանական ընկերությունը։
 

Ըստ աղբյուրի փոխանցման՝ անցած տարի հիմնված Exaltation Limited ընկերության սեփականատերերն են Ալիևի դուստրերը, ինչի մասին հայտնի է դարձել պանամական Mossack Fonseca իրավաբանական ընկերության գործունեության վերաբերյալ գաղտնի փաստաթղթերի արտահոսքից հետո։

OCCRP–ը նաև ներկայացնում է այլ երկրներում Ալիևների ընտանիքին պատկանող անշարժ գույքի լուսանկարներ ու դրանց մոտավոր արժեքը։