Ռուսաստանը պարզեցրել է Վրաստանի քաղաքացիների համար վիզային ռեժիմը

Tert.am-ը գրում է.

ՌԴ արտաքին գործերի նախարարությունը հայտարարել է դեկտեմբերի 23-ից Վրաստանի հետ վիզային ռեժիմն ազատականացնելու մասին, հայտնում է meduza.io-ն։

 

Այսուհետ Վրաստանի քաղաքացիները կարող են դեպի Ռուսաստան մասնավոր վիզաներ ձևակերպել այն մարդկանց հրավերով, որոնց հետ ազգակցական կապեր չունեն։ Բացի այդ, Ռուսաստանը վրացիներին «բազմակի» կտրամադրի գործնական/աշխատանքային, ուսումնական և մարդասիրական վիզաներ։

 

Որոշումն ընդունվել է «ռուս-վրացական հարաբերությունների կարգավորման գործընթացի կոնտեքստում», ասվում է ԱԳՆ կայքում տեղադրված հաղորդագրության մեջ։

 

Ռուսաստանի ու Վրաստանի միջև վիզային ռեժիմը գործում է 2000 թվականից։ 2012թվականից Վրաստանը միակողմանի չեղարկել է Ռուսաստանի հետ վիզային ռեժիմը։

 

Դեկտեմբերի 17-ին ՌԴ նախագահ Վլադիմիր Պուտինը հայտարարել էր, որ Ռուսաստանը պատրաստ է չեղարկել Վրաստանի հետ վիզային ռեժիմը։