Թվում է՝ սատանան պետք է, որ հանգիստ թողներ նրանց, ովքեր ապրում են հանգիստ... առանց Աստծո, սակայն եթե աստվածապաշտներին նա, մեղմ ասած, անհանգստացնում է, ապա անաստվածներին եւ աստվածամարտներին առաջարկում է իր թեկնածությունը, որովհետեւ մարդը, ի վերջո, կրոնական էակ է: 
Բոլորին է հայտնի առաջին մարդկանց անկումը, որին հետեւեց նրանց սերունդների բարոյալքումը: 
Ավանդությունը ասում է, որ սատանան առաջարկում է Կայենին, որ իրեն երկրպագի, Կայենը հրաժարվում է՝ պատճառաբանելով, որ ինքը ոչ ոքի չի երկրպագում՝ ոչ Աստծուն, ոչ՝ սատանային: Վերջինս, սակայն, առարկում է.«Աստծուն չպաշտողը, ինձ է պաշտում»: 
Սուրբ Գիրքը վկայում է, որ կռապաշտությունը սատանայապաշտություն է. «Հեթանոսների բոլոր կուռքերը դեւեր են»: 
Սատանայապաշտությունը հնագույն կրոն է, իր՝ դարերի ընթացքում ամբողջացած ծիսակարգով: Սատանան միշտ ձգտել է համաշխարհային տիրապետության. նա ցանկանում է, որպեսզի բոլորը իրեն երկրպագեն, սակայն ոչ այնքան իր փառամոլության համար, որքան հանուն իր վրեժին հագուրդ տալու եւ մարդկությանը կործանելու մոլուցքի: 
Ինչպես նշեցինք, սատանայապաշտությունը կրոն է եւ ունի իր ծեսերը, որոնցից մեկը սեւ պատարագն է: Այն մատուցվում է կեսգիշերին, սատանայի սպասավոր քրմի կողմից: Մոմերը աշտանակներին գլխիվայր են ամրացվում: Քուրմը կրում է շքեղ զարդարված շուրջառ, որը հակառակ է հագնում: Վերցնելով աղոթագիրքը՝ քուրմը սկսում է կարդալ հակառակ կարգով՝ վերջից սկիզբ: Աստծո, Հիսուսի, Սուրբ Կույս Մարիամի սրբազան անունները կարդացվում են հակառակ կողմից: Խաչելությունը գլխիվայր է ամրացվում, կամ նետվում է գետնին՝ անարգվելու, ոտնակոխ արվելու համար: Որեւէ կնոջ մերկ մարմինը զոհասեղանի դեր է կատարում: Նվիրաբերվելիք զոհը, որ ծառայում է հաղորդության ծաղրապատկերը ներկայացնելու համար, գողացված է լինում եկեղեցուց, խառնված ողջ աքաղաղի արցունքներով ու կղկղանքով, եւ իբր «գոյափոխվում է» Լյուցիֆերի «մարմնի եւ արյան»: Սեւ պատարագի ընթացքում Աստվածաշունչն այրում են: Ներկաները երդվում են գործել յոթ մահացու մեղքերը, խախտել տասը պատվիրանները, երդվում են ոչ մի լավ բան չկատարել: Ծիսակատարությունն ավարտվում է արյունալի խնջույքով՝ պարտադիր զոհաբերությամբ. զոհաբերում են կենդանիների, նաեւ՝ մարդկանց: Սատանայապաշտության ձեռնադրման գերագույն ծեսերի ժամանակ թեկնածուն ստանում է կախարդված թուր, որը նրան մշտական հաջողություն է ապահովելու: Սատանայի եւ նրա երկրպագուների միջեւ դաշինք է կնքվում, որը վավերացվում է երդվողի դաստակից վերցված արյամբ, 
1.հրաժարվել քրիստոնեական դաստիարակությունից, անվանափոխվել, 
2.նորից մկրտվել սադայելի անունով, հրաժարվելով կնքահորից եւ կնքամորից՝ նրանց փոխարինել այլ խնամակալներով 
3.ընդունել սատանայի նվիրած հագուստը, 
4.կախարդական շրջանի մեջ կանգնելով՝ արտասանել հավատարմության երդումը, 
5.նորընտրյալ անդամի անունը նշել «հանգուցյալների գրքում»՝ ի տարբերություն Քրիստոսի Կյանքի Գրքի, 
6. սեփական երեխաներին սատանային նվիրելու խոստում տալ, խոստանալ այնպիսի նվերներ ու արարքներ, որ նրան հաճո լինեն, 
7.ամեն ինչ անել քրիստոնեությունը հեղինակազրկելու համար եւ այլն: 
Սատանայի «եկեղեցու» ձեռնադրման երրորդ աստիճանի արարողության ժամանակ պետք է արտասանել հետեւյալ երդումը.«Ամեն ինչում եւ ամեն ինչի համար կանեմ միայն այն, ինչ ինձ դուր է գալիս»: Սա նշանակում է՝ հրաժարում Աստծո պատվիրանից. «Մի հետեւիր սրտիդ ու աչքերիդ ցանկությանը, դրանք քեզ մոլորության են տանում»: Իսկ ձեռնադրման 7-րդ աստիճանում երդվում են, որ այսուհետեւ իրենք կառաջնորդվեն «Ոչինչ ճշմարիտ չէ, ամեն բան թույլատրելի է» սկզբունքով, որը սեղմ հնչում է այսպես. «Արգելվում է արգելելը»: Եթե արգելվում է արգելելը, ուրեմն արգելվում է նաեւ արգելելը: Մյուս կողմից, եթե ամեն ինչ թույլատրելի է, ինչո՞ւ է արգելվում արգելելը: Արգելվում է արգելել ամեն բան, որ կարող է կասեցնել մարդու եւ մարդկության ընթացքը դեպի անաստվածություն եւ ամենաթողություն: 
Սատանայապաշտները դարեր իվեր մշակել ու համակարգել են իրենց սիմվոլիկան, որն այսօր ամենաբազմազանն ու ամենաստվարն է եւ համալրվում է ժամանակին համընթաց: Սադայելի պաշտամունքը խիստ գաղտնի է: Ամեն դեպքում, արդարության համար պետք է նկատել, որ այդ գաղտնիությունը չեն ապահովում չարի շարքային գաղտնապահ հետեւորդները, այլ դա արվում է շատ ավելի ավելի բարձր մակարդակով եւ շատ ավելի կազմակերպված: Սատանայապաշտական սիմվոլների շարքում եռակի վեցերի եւ շրջված պենտագրամաների, ձեռքերի մատների պոզանման կոմբինացիաների եւ այլնի կողքին շատ են նաեւ խաչի նշանի համադրությամբ սիմվոլները, որոնք առավել վտանգավոր են, քանզի անտեղյակ մարդկանց կարող են շփոթության մատնել եւ աղճատել խաչի մասին նրանց պատկերացումները: 
Աստծունն ընդդեմ Աստծո. սա է սատանայի եւ նրա արբանյակների իրական մտայնութունը, Աստծո արարչությունը պղծել, ապստամբեցնել, հանել Արարչի դեմ . սա է սատանայապաշտության գերնպատակը: 
Մենք կանդրադառնանք պատմության տարբեր հանգրվաններում սատանայապաշտության տարբեր դրսեւորումներին, աշխարհի սատանայապաշտ ղեկավարների սանձարձակություններին, հասարակական եւ մշակութային այն ոլորտներին, որոնց վրա իր արատավոր թաթն է դրել կորստյան որդին:
  
Լիլիթ Հովհաննիսյան 

 

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել