Դեկտեմբերի 6-ի հանրաքվեի տվյալների հավանական կեղծարարական մեխանիզմների կիրառումն ակնկալում էր Հայաստանի ողջ քաղաքական-հասարակական դաշտը, և շնորհիվ մի շարք համարձակ և հնարամիտ մարդկանց՝ առկա են հստակ փաստեր, որոնք վկայությունն են այն բանի, որ իրականացվել են բռնություններ, հանձնաժողովի անդամների կողմից մասսայական լցոնումներ և ՈՉ-ի ընտրաթերթիկների գողություն, 10000 դրամի չափով ընտրակաշառքի բաժանում, որի պատճառով սահմանային լարվածության մեջ պայմանագրային զինծառայողների աշխատավարձերից պահումներ են արվում 10000 դրամի չափով։ Մի խոսքով, առկա է տեսանյութերի մի մեծ քանակ, որը կասկածի տակ է դնում հանրաքվեի լեգիտիմությունը։ Եվ այս առիթով հստակ առկա է ԵԽԽՎ դիտորդների եզրակացությունն այն մասին, որ հանրաքվեն պետք է անվավեր ճանաչվի։
Հարց. ինչ անել։
Պատասխան. բոլոր այն անձիք, ովքեր ի պաշտոնե կամ ոչ ի պաշտոնե ձեռքի տակ ունեն այդ տեսանյութերը, պետք է դատախազություն դիմեն և մինչև վերջ հետամուտ լինեն, որ հանցագործները կրեն օրենքով նախատեսված պատիժները։ Հարկավոր է միջնորդության պահանջով դիմել բոլոր այն դիտորդական կազմակերպություններին, ովքեր բացասական գնահատական են տվել հանրաքվեի արդյունքների վերաբերյալ։ Եթե այս ամենը չարվի, ուրեմն հանրաքվեի գործընթացի մեջ ներգրավված քաղաքական և հասարակական ուժերը պարապուրդի են մատնված։ Թեև «Նոր քաղաքական մշակույթ» կուսակցությունը պաշտոնական ներգրավվածություն չի ունեցել հանրաքվեի վերահսկողության գործընթացում, ես ինքս կուսակցության անունից համապատասխան դիմում-պահանջներ կհղեմ համապատասխան մարմիններին, սակայն գլխավոր անելիքը նրանցն է, ովքեր դե յուրե ներգրավված են եղել գործընթացի վերահսկողության մեջ։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել